नोकरीच्या प्रलोभनाने पाच लाखांचा गंडा

नोकरीच्या प्रलोभनाने पाच लाखांचा गंडा
मंत्रालयात ओळख असल्याचे सांगून फसवणूक
सकाळ वृत्तसेवा
ठाणे, ता. १२ : दिव्यांग असलेल्या ८१ वर्षीय आजोबांना शेजारी राहणाऱ्या सुरक्षा रक्षक अधिकाऱ्याने पोलिस खात्यात नातवाला नोकरी लावण्याचे प्रलोभन दाखवत तब्बल पाच लाख २० हजार रुपयांचा गंडा घातल्याचा धक्कादायक प्रकार उघडकीस आला आहे. ठाण्यातील श्रीनगर पोलिस ठाण्यात याप्रकरणी रमेश खरात याच्याविरोधात गुन्हा दाखल केला आहे.

तक्रारदार विठ्ठल भाळशंकर हे वागळे इस्टेट परिसरातील भटवाडी येथे राहतात. व्यवसायानंतर सध्या ते निवृत्त असून दिव्यांग आहेत. ते सध्या त्यांच्या मुलीकडे राहतात. त्यांचा नातू पदवीधर असून, सध्या कॉल सेंटरमध्ये काम करीत आहे. त्याला स्थिर सरकारी नोकरी मिळावी यासाठी प्रयत्न सुरू होते. शेजारीच राहणारे रमेश खरात याने विठ्ठल आजोबांशी जवळीक साधत, ‘माझी मंत्रालयात ओळख आहे. माझे नातेवाईक पोलिस खात्यात आहेत. मी सिक्युरिटी ऑफिसर आहे,’ असे सांगत विश्वास संपादन केला. त्यानंतर तो म्हणाला, की तुमच्या नातवाला पोलिस खात्यात नोकरी लावतो, पण काही खर्च करावा लागेल. यावर आजोबांनी विश्वास ठेवत ११ मे २०२३ ते २२ नोव्हेंबर २०२३ या काळात वेळोवेळी रोख स्वरूपात पाच लाख २० लाख रुपये रमेश खरात याला दिले. त्यानंतरही नातवाला नोकरी मिळाली नाही. नोकरीबाबत वारंवार विचारणा केल्यानंतर रमेश खरात याने ‘काम सुरू आहे’, ‘लवकरच पत्र येईल’ अशी उत्तरे दिली. पण नंतर तो टाळू लागला, फोन उचलणे बंद केले. पैसे परत मागितल्यावर सध्या माझ्याकडे पैसे नाहीत, मिळाले की देईन, असे सांगून वेळकाढूपणा करीत राहिला. प्रत्यक्षात मात्र पैसे परत दिले नाहीत, ना नोकरी मिळाली. या प्रकारामुळे आजोबांनी थेट श्रीनगर पोलिस ठाण्यात तक्रार दाखल केली. पोलिसांनी फसवणूक व विश्वासघात यासंबंधी रमेश खरात याच्याविरुद्ध गुन्हा दाखल केला असून, पुढील तपास सुरू आहे.