रुक्मिणीबाई रुग्णालयात थॅलेसिमिया केंद्र

रुक्मिणीबाई रुग्णालयात थॅलेसेमिया केंद्र
१५ ऑगस्टपासून सुरुवात; रुग्णांसाठी आशेचा किरण
कल्याण, ता. १३ (बातमीदार) : रुक्मिणीबाई रुग्णालयात थॅलेसेमिया या गंभीर रक्तविकाराने पीडित रुग्णांसाठी स्वतंत्र उपचार केंद्र सुरू होणार आहे. १५ ऑगस्ट रोजी दुपारी १ वाजता या केंद्राचे उद्घाटन रोटरी क्लब ऑफ सेंट्रल कल्याण, अर्पण थॅलेसेमिया सिकल सेल सोसायटी आणि कल्याण-डोंबिवली महानगरपालिका यांच्या संयुक्त विद्यमाने होणार आहे. कार्यक्रमाचे प्रमुख पाहुणे म्हणून महानगरपालिकेचे आयुक्त अभिनव गोयल आणि रोटरीचे जिल्हा गव्हर्नर हर्ष मकोल हे उपस्थित राहणार आहेत.

थॅलेसेमिया केंद्रात थॅलेसेमियाग्रस्त मुलांसाठी नियमित रक्त संक्रमण व तपासणी, शरीरातील अतिरिक्त लोह कमी करण्यासाठी आवश्यक औषधोपचार हाडांची घनता तपासणी, इको अशा विशेष तपासण्यांची सुविधा पुरविण्यात येणार आहेत. तसेच येथे संपूर्ण उपचारसेवा मोफत उपलब्ध असणार आहे. पालकांसाठी मार्गदर्शन व समुपदेशन केले जाणार आहे. या उपक्रमामध्ये प्रकल्प समितीचे अनंत देवरे, संजय भोळे, धनंजय पाटील तसेच रोटरी अध्यक्ष रवींद्र कुर्हाडे व सचिव भुवनेश्वरन यांचा मोलाचा सहभाग आहे. केंद्राच्या माध्यमातून गरजू रुग्णांना केवळ उपचार नव्हे तर नवजीवनाची संधी मिळणार आहे. ‘थॅलेसेमियामुक्त भविष्यासाठी’ एक सकारात्मक आणि दूरदृष्टीपूर्ण पाऊल म्हणून या उपक्रमाकडे पाहिले जात आहे.