वाहतूक कोंडीवरून आंदोलनाचा इशारा

वाहतूक कोंडीवरून आंदोलनाचा इशारा
कल्याण-डोंबिवलीतील नागरिकांचा वैताग : राष्ट्रवादी शरद पवार गटाचे निवेदन
डोंबिवली, ता. १३ (सकाळ वृत्तसेवा) : कल्याण-शिळफाटा रस्त्यावर दररोज प्रचंड वाहनांची कोंडी होत असून, या मार्गावर वाहतूक तासन्‌तास ठप्प होते. मेट्रोच्या कंत्राटदाराचा बेशिस्त कारभार आणि सर्रास अवजड वाहनांची वाहतूक हे कोंडीचे प्रमुख कारण असल्याचा आरोप करीत राष्ट्रवादी काँग्रेस पार्टी (शरद पवार गट) यांनी संबंधित अधिकाऱ्यांना निवेदन देऊन आंदोलनाचा इशारा दिला आहे. मेट्रोच्या कामामुळे अपुरी जागा व अनियमित वाहतूक कोंडी होते. अवजड वाहनांची सर्रास वाहतूक होते. अंतर्गत रस्त्यांवर खड्डे पडून त्यांची दुरवस्था झाली आहे. रिक्षांची भरमसाठ वाढ आणि वाहतूक शाखेची निष्क्रियता हेदेखील कोंडीचे कारण आहे.
राष्ट्रवादी काँग्रेस (शरद पवार गट) शहराध्यक्ष भालचंद्र पाटील, कल्याण जिल्हा उपाध्यक्ष राजेश शिंदे, कल्याण ग्रामीण अध्यक्ष मधुकर माळी, डोंबिवली शहर कार्याध्यक्ष रविकिरण बनसोडे यांच्या शिष्टमंडळाने कोळसेवाडी वाहतूक शाखेचे वरिष्ठ पोलिस निरीक्षक सचिन सांडभोर आणि डोंबिवली शहर वाहतूक निरीक्षक श्रीराम पाटील यांची भेट घेऊन निवेदन दिले. कल्याण-शिळफाटा रस्त्यावर अवजड वाहनांना बंदी घालावी, मेट्रो कंत्राटदारांकडून नियोजनबद्ध वाहतूक मार्ग ठरवावा, अंतर्गत रस्त्यांची तातडीने दुरुस्ती करावी, रिक्षा आणि अवजड वाहनांची संख्या नियंत्रणात आणावी अशी मागणी केली आहे. तसेच वाहतूक कोंडीच्या समस्येकडे संबंधित प्रशासनाने तातडीने लक्ष न दिल्यास राष्ट्रवादी शरद पवार गट रस्त्यावर उतरेल आणि तीव्र आंदोलन छेडले जाईल, असा इशारा पक्षाच्या वतीने देण्यात आला.