स्वच्छ भारतासाठी कल्याणमध्ये अभियान

स्वच्छ भारतासाठी कल्याणमध्ये अभियान
मराठा कोळसेवाडी मंडळाचा उपक्रम

कल्याण, ता. १३ (बातमीदार) : स्वातंत्र्यदिनापूर्वी मराठा कोळसेवाडी मंडळ कल्याण पूर्व तर्फे विठ्ठलवाडी वालधुनी येथील संत तुकाराम स्मारक येथे बुधवारी (ता. १३) स्वच्छता अभियान राबविण्यात आले होते. समाजात स्वच्छतेबाबत जागरूकता निर्माण करण्याच्या हेतूने आयोजकांनी केवळ मार्गदर्शनच नव्हे, तर स्वतः श्रमदान करून एक आदर्श उभा केला आहे. या उपक्रमात स्थानिक आमदार सुलभा गायकवाड, मंडळ अध्यक्ष विजय उपाध्याय, सरचिटणीस बाळू शेख, स्वच्छता अभियान सेलचे अध्यक्ष मृत्युंजय शुक्ला यांच्यासह सर्व पदाधिकारी व कार्यकर्त्यांनी उत्साहाने सहभाग घेतला होता.

स्वच्छता अभियानादरम्यान परिसरातील कचरा व अडथळे दूर करून स्मारक परिसर स्वच्छ व सुंदर करण्यात आला. याप्रसंगी उपस्थित मान्यवरांनी, ‘स्वच्छ भारत, सुंदर भारत: हा संकल्प प्रत्येकाने आपल्या दैनंदिन जीवनात उतरविला, तरच राष्ट्र प्रगतीच्या मार्गावर वेगाने पुढे जाईल, असे प्रतिपादन केले. देशभक्तीचा खरा अर्थ राष्ट्रसेवा असल्याचे सांगून आयोजकांनी स्वच्छतेला त्या सेवेची पहिली पायरी मानण्याचे आवाहन केले. या उपक्रमामुळे परिसरातील नागरिकांमध्ये स्वच्छतेबद्दल सकारात्मक संदेश पसरला आहे.

स्वातंत्र्यदिनापूर्वी परिसर स्वच्छता ही एक अत्यंत महत्त्वाची सामाजिक जबाबदारी आहे. स्वच्छता केवळ आपल्या घरापुरती मर्यादित न राहता आपल्या परिसरापर्यंतदेखील रुजवावी लागते, यामध्ये कचरा व्यवस्थापन, स्वच्छ हवा, स्वच्छ पाण्याचा पुरवठा, सार्वजनिक शौचालयांची योग्य देखभाल, आणि सांडपाणी व्यवस्थापन या गोष्टींना महत्त्व देणे गरजेचे असल्याचे आयोजकांनी सांगितले. स्वातंत्र्यदिनी देशभक्तीचा उत्सव असून, त्या वेळी सार्वजनिक ठिकाणांची स्वच्छता करून नागरिकांमध्ये स्वच्छतेची जाणीव अधिक वाढवता येत असल्याचेही या वेळी आयोजक म्हणाले.