मतदार नोंदणी अभियानाच्या मंडपांचे अडथळे

मतदार नोंदणी अभियानाच्या मंडपांचे अडथळे

सकाळ वृत्तसेवा
डोंबिवली, ता. १३ : कल्याण-डोंबिवली शहरातील नागरिक आधीच वाहतूक कोंडीने हैराण झाले आहेत. त्यात आता रस्त्यावर उभारण्यात आलेले छोटे छोटे मंडप त्यात भर पाडत आहेत. पालिका निवडणुकीच्या पार्श्वभूमीवर आधार कार्ड, पॅन कार्ड नोंदणीसाठी शहरात ठिकठिकाणी छोटे मंडप उभारण्यात आले आहेत. या मंडपामुळे शहरातील कोंडीत अडथळ्यांची नव्याने भर पडली आहे. या मंडपांना परवानगी कोणी दिली, कोणाच्या आशीर्वादाने ते उभे राहिले आहेत. वाहतूक विभागाचे त्याकडे कधी लक्ष जाणार, असा सवाल यनिमित्ताने उपस्थित केला जात आहे.

कल्याण-डोंबिवली महापालिका हद्दीत अंतर्गत मोठ्या प्रमाणात वाहन कोंडी होत आहे. रस्त्यांची तसेच गटारांची कामे सुरू असल्यामुळे ठरावीक रस्त्यांवर मोठी कोंडी होत असल्याचे दिसून येत आहे. दहीहंडी, गमेशोत्सव या सणामुळे शहरात कमानी लागण्यास सुरुवात झाली आहे. त्यासोबतच आगामी पालिका निवडणुकीच्या पार्श्वभूमीवर राजकीय पक्षांकडून मतदारांना खूश करण्यासाठी आधार कार्ड, पॅन कार्ड नोंदणी, मतदार ओळखपत्र आदी सुविधा देणारे मंडप उभारण्यात आले आहेत. स्थानक परिसरात हे मंडप उभारण्यात आले आहेत. स्थानक परिसरात फेरीवाले, रिक्षाचालक व इतर वाहनांची कायम वर्दळ असते. वाहनांच्या या वर्दळीमुळे अनेकदा वाहनचालकांना रस्त्याने चालणेदेखील मुश्कील होऊन जाते.

गेल्या महिनाभरापासून स्थानक परिसरात उभे असलेले मतदार नोंदणी अभियान, आधार कार्ड, पॅन कार्ड नोंदणी अभियान यांचे मंडपदेखील वाहतुकीला अडथळा ठरत आहेत. हे मंडप रस्त्यावर उभे करण्याची परवानगी कोणी दिली, असा सवाल सर्वसामान्य नागरिक करत आहेत.

मिरवणुकांमुळे कोंडीत भर
गणेशोत्सव जवळ आला असून, गणपती मंडळाच्या वतीने शहरातील विविध भागात गणपतीचे मंडप उभारण्याचे काम सुरू आहे. यामुळे रस्ते अरुंद झाले आहेत. त्यासोबतच मंडळांचे गणपती येण्यासदेखील सुरुवात झाली असून, गणपती मिरवणुका या कोंडीत भर घालत आहेत. दरवर्षीचे हे चित्र असून, वाहतूक पोलिस, पालिका प्रशासन या सर्व गोष्टींचे नियोजन आधीच का करत नाहीत, असा सवाल सर्वसामान्य नागरिक उपस्थित करत आहेत. तसेच नागरिकांना होणाऱ्या त्रासाची दखल कोणी घेणार आहे की नाही, असा प्रश्न डोंबिवलीकर उपस्थित करू लागले आहेत.