कंत्राटी अधिकारी, कर्मचाऱ्यांचा आंदोलनाचा इशारा

कंत्राटी अधिकारी, कर्मचाऱ्यांचा आंदोलनाचा इशारा
आरोग्य विभागात २० वर्षे सेवेनंतरही नियमित नाही
सकाळ वृत्तसेवा

ठाणे, ता. १३ : गेल्या १५ ते २० वर्षांपासून राष्ट्रीय आरोग्य अभियानअंतर्गत कंत्राटी पद्धतीने अधिकारी व कर्मचारी कार्यरत आहेत. १४ मार्च २०२४ रोजीच्या सरकारच्या निर्णयानुसार १० वर्षांपेक्षा अधिक सेवा असलेल्या कर्मचाऱ्यांचे ६९ संवर्गातील नियमित समायोजन तत्काळ करावे या मागणीसाठी कर्मचारी संघटनांनी मंगळवार (ता. १९) बेमुदत काम बंद आंदोलनाची हाक दिली आहे. यामध्ये ठाणे जिल्ह्यातील अधिकारी, कर्मचारीदेखील सहभागी होणार असून, ठाणे जिल्हाधिकारी कार्यालयासमोर हे आंदोलन करण्यात येणार असल्याची माहिती राज्य समन्यवक मनीष खैरनार यांनी दिली.
सरकारने १४ मार्च २०२४ चे आदेश त्वरित लागू करणे आणि उर्वरित ६९ संवर्गांचे नियमित समायोजन, १५ टक्के मानधन वाढ तत्काळ लागू करणे, बदली धोरण, कर्मचारी भविष्य निर्वाह निधी (ईपीएफ) व विमा योजना लागू करणे, शैक्षणिक पात्रता व कामाच्या जबाबदारीनुसार वेतन सुसूत्रीकरण व जुन्या-नव्या कर्मचाऱ्यांतील तफावत दूर करणे, सेवेत असताना मृत्यू झाल्यास ५० लाख व अपंगत्व आल्यास २५ लाख सानुग्रह अनुदान आदी १८ मागण्यांसाठी बेमुदत संपाचा इशारा देण्यात आला आहे. या आंदोलनाचे नेतृत्व राष्ट्रीय आरोग्य अभियानातील अधिकारी व कर्मचारी एकत्रीकरण समिती आणि एकता संघ महाराष्ट्र राज्य अशा १८ संघटना करणार आहेत. या बेमुदत काम बंद आंदोलनामुळे ठाणे जिल्हा आणि राज्यातील आरोग्यसेवांवर परिणाम होण्याची शक्यता आहे. त्यामुळे शासनाने तातडीने निर्णय घेतला नाही, तर संघर्ष उग्र होण्याचा इशाराही संघटनांनी दिला आहे.