तुला चिरून कुकरमध्ये टाकू!

तुला चिरून कुकरमध्ये टाकू!
तरुणीला धमकी; लव्ह जिहादचा दावा

टिटवाळा, ता. १३ (वार्ताहर) ः प्रेमसंबंधातून आंतरधर्मीय विवाह केल्यानंतर सतत शारीरिक व मानसिक छळ केला, धमक्या दिल्या आणि दोन लहान मुलांना जबरदस्तीने पतीने दूर नेले, अशी गंभीर तक्रार २६ वर्षीय महिलेने पोलिसांकडे नोंदवली आहे. पतीच्या मोठ्या भावाने तर ‘तुला चिरून कुकरमध्ये टाकून देऊ, कोणालाही कळणार नाही,’ अशी धमकी दिल्याचाही आरोप पीडितेने केला आहे. पोलिसांनी गुन्हा दाखल करून तपास सुरू केला आहे. या प्रकरणावर विश्व हिंदू परिषदेने ‘लव्ह जिहाद’चा दावा करीत कठोर कारवाईची मागणी केली आहे.
पीडितेच्या म्हणण्यानुसार, २०१८ मध्ये बाबू अन्चर अली सय्यद याच्याशी कोर्ट मॅरेज केल्यानंतर तिचे नाव बदलून मुस्लिम धर्मानुसार करण्यात आले. लग्नानंतर टिटवाळा आणि भायखळा येथे राहताना तिला घरकामासोबतच पतीच्या भावाच्या मुलांची जबाबदारी उचलावी लागली. जुन्या मित्राशी झालेल्या साध्या संवादावरून पतीने मारहाण केली, तसेच हातावर असलेला ‘ओम’ अक्षरांचा टॅटू काढण्यासाठी हात जाळण्याची क्रूर वागणूक दिली. ४ ऑगस्ट २०२५ रोजी पतीने दोन वर्षे आठ महिन्यांचा मुलगा आणि ११ महिन्यांचा धाकटा मुलगा जबरदस्तीने ताब्यात घेतला असून, तेव्हापासून त्यांची भेट झालेली नाही. दारूचे व्यसन, आर्थिक शोषण आणि मानसिक छळामुळे पीडितेचे आयुष्य उद्ध्वस्त झाल्याचे ती सांगते. ‘मी कुटुंबाच्या विरोधात जाऊन पतीशी लग्न केले; पण आज तोच माझ्या चारित्र्यावर प्रश्नचिन्ह निर्माण करतो. मुलांशिवाय जगणे अशक्य आहे,’ असे तिने सांगितले.
...
विश्व हिंदू परिषद आक्रमक
कल्याण जिल्हा विश्व हिंदू परिषदेचे उपाध्यक्ष ॲड. सुधा जोशी, सहमंत्री लक्ष्मी कांत पाठक, बजरंग दल जिल्हा संयोजक अनिकेत महात्रे, सहसंयोजक दिनेश काले, टिटवाळा प्रखंड अध्यक्ष सूर्यकुमार भोय, प्रखंड मंत्री अमित सिंह यांच्यासह कार्यकर्त्यांनी या प्रकरणात पोलिस ठाण्यात हजेरी लावून ‘लव्ह जिहाद’चा दावा करीत पीडितेला न्याय मिळवून देण्यासाठी ठाम भूमिका घेतली आहे.