शास्ती माफीचा पालिकेला १५० कोटींचा फटका

शास्ती माफीचा पालिकेला १५० कोटींचा फटका
दीड लाख अनधिकृत बांधकामांवर दिलासा
सकाळ वृत्तसेवा
ठाणे, ता. १३ : ठाणे पालिका क्षेत्रातील अनधिकृत बांधकामांवर शास्ती (दंड) लावून त्यावर नियंत्रण ठेवण्याचा प्रयत्न प्रशासनाने केला होता. त्यासाठी मालमत्ता कराच्या अधिक दीडपट शास्ती लावण्याचा निर्णयही घेण्यात आला होता, मात्र राज्य मंत्रिमंडळाच्या ताज्या बैठकीत अनधिकृत बांधकामांवरील या शास्तीची माफी करण्याचा निर्णय घेण्यात आला आहे. याचा फायदा ठाणे पालिका क्षेत्रातील सुमारे एक लाख ४५ हजार मालमत्ताधारकांना होणार असून, ठाणे पालिकेला अंदाजे १५० कोटी रुपयांचा आर्थिक फटका बसणार आहे.

ठाणे पालिका प्रशासनाला अनधिकृत बांधकामांवर योग्य नियंत्रण न ठेवल्यामुळे काही काळापासून टीका सहन करावी लागत आहे. दिवा-शिळ परिसरातील अनधिकृत बांधकामांवर न्यायालयीन आदेशानुसार कारवाई करण्यात आली होती. अशा ठिकाणी शास्ती लावण्याचा निर्णय घेतला होता, पण अनधिकृत बांधकामावरील दंड माफ केल्याने मालमत्ता कराच्या मूळ रकमेत वाढ होईल, त्यामुळे अधिक महसूल मिळेल, असा विचार करून, पिंपरी-चिंचवड महापालिकेच्या धर्तीवर ठाणे महापालिका हद्दीतील अनधिकृत बांधकामांवरील दंड माफ करण्याचा निर्णय पावसाळी अधिवेशनात राज्य मंत्रिमंडळाने मंजूर केला आहे.

ठाणे शहरात २००९ ते २०१७ या काळातील अनधिकृत बांधकामांवरील दंड या निर्णयानुसार माफ होणार आहे. या दंडाची एकूण रक्कम साधारण १५० कोटी रुपयांच्या आसपास आहे. प्रशासनाचा दावा आहे की यामुळे मालमत्ता कराच्या मूळ रकमेवर जास्त भर पडेल आणि महसूल वाढेल. आधी या दंडाचे प्रमाण मूळ करापेक्षा जास्त असल्यामुळे मालमत्ता धारक दंड भरायला टाळाटाळ करत होते. त्यामुळे महापालिकेचा महसूल कमी होतोय असा आरोप होता. तरीही, महापालिकेची आर्थिक स्थिती अजूनही सुधारलेली नाही आणि या शास्ती माफीमुळे उत्पन्नावर परिणाम होईल असा अंदाज वर्तविला जात आहे.