सार्वजनिक वाचनालय कल्याणला सर्वोत्कृष्ट ग्रंथालय पुरस्कार

सार्वजनिक वाचनालय कल्याणला सर्वोत्कृष्ट ग्रंथालय पुरस्कार
कल्याण, ता. १३ (वार्ताहर) : महाराष्ट्र शासनाच्या उच्च व तंत्र शिक्षण विभागांतर्गत ग्रंथालय संचालनालयाकडून राज्यातील शासनमान्य सार्वजनिक ग्रंथालयांच्या गुणवत्तेच्या वृद्धीसाठी आणि वाचनसंस्कृतीला चालना देण्यासाठी विविध उपक्रम राबविले जातात. याच उद्देशाने १६२ वर्षे अविरत वाचन परंपरा जपणाऱ्या सार्वजनिक वाचनालय कल्याण या ऐतिहासिक वाचनालयाला २०२३-२४ साठी डॉ. बाबासाहेब आंबेडकर सर्वोत्कृष्ट ग्रंथालय पुरस्कार देऊन सन्मानित करण्यात आले आहे. हा पुरस्कार ग्रंथालयशास्त्राचे जनक मानल्या जाणाऱ्या डॉ. एस. आर. रंगनाथन यांच्या जन्मदिनी ज्याला जागतिक ग्रंथपाल दिन म्हणून साजरा केला जातो, त्यानिमित्ताने प्रदान करण्यात आला आहे.

पुरस्कार वितरण समारंभात उच्चतंत्र शिक्षण विभागाचे शिक्षणमंत्री चंद्रकांत पाटील, विधान परिषदेच्या उपसभापती नीलम गोऱ्हे, शिक्षण विभागाचे मुख्यसचिव गोपालाचार्य रेड्डी यांनी वाचनालयाचे अध्यक्ष मिलिंद कुलकर्णी आणि सरचिटणीस भिकू बारस्कर यांना हा प्रतिष्ठित पुरस्कार प्रदान केला.

रोख रक्कम एक लाख रुपये, सन्मानचिन्ह आणि प्रमाणपत्र असे या पुरस्काराचे स्वरूप आहे. समारंभात ग्रंथालय संचालक अशोक गाडेकर, महाराष्ट्र ग्रंथालय संघाचे अध्यक्ष गजानन पोटेवार, जिल्हा ग्रंथालय अधिकारी प्रशांत पाटील आणि इतर मान्यवर उपस्थित होते. सार्वजनिक वाचनालय कल्याणच्या कामगिरीचे राज्यातील ग्रंथालय क्षेत्रातील सर्व स्तरातून कौतुक होत असून, या पुरस्कारामुळे वाचन संस्कृतीला नवी उर्जा मिळाली आहे.