गुन्हेगारांना परमेश्वरही सोडणार नाही!

गुन्हेगारांना परमेश्वरही सोडणार नाही!
कपिल पाटील संतप्त

भिवंडी, ता. १३ (वार्ताहर) ः खार्डी येथील दुहेरी हत्याकांडात जीव गमावलेल्या प्रफुल्ल तांगडी व तेजस तांगडी यांच्या मारेकऱ्यांना पोलिसच काय परमेश्वरसुद्धा सोडणार नाही, अशी संतप्त प्रतिक्रिया माजी केंद्रीय राज्यमंत्री कपिल पाटील यांनी दिली आहे. या दोघांची हत्या सोमवारी झाल्यानंतर कपिल पाटील बुधवारी खार्डी गावात या दोन्ही तांगडी कुटुबीयांच्या सांत्वनासाठी पोहोचले होते. त्या वेळी ते माध्यमांशी बोलत होते.
त्यांच्यासोबत या वेळी भाजप युवा मोर्चा प्रदेश उपाध्यक्ष देवेश पाटील, मंडळ अध्यक्ष नीलेश गुरव व पदाधिकारी उपस्थित होते. ‘प्रफुल्ल व तेजस यांची हत्या ही अत्यंत घृणास्पद कृत्य आहे. या घटनेचा सर्व स्तरांतून निषेध होत आहे. समाजामध्ये अशा पद्धतीने घटना घडत असताना त्याचे मूळ शोधण्याचे काम पोलिसांनी केले पाहिजे. मी मुख्यमंत्री देवेंद्र फडणवीस यांच्याशी संपर्क साधून घटनेची माहिती दिली. त्यांनी कठोरातील कठोर शासन करण्याचे आश्वासन दिले आहे. पोलिसांनीसुद्धा या गुन्ह्याचा सखोल तपास सुरू केला आहे. या घटनेतील एकही आरोपी मोकाट सुटणार नाही, याची खबरदारी पोलिसांनी घेण्याची गरज आहे.’ असे ते म्हणाले. कुटुंबीयांसह भारतीय जनता पक्षाच्या भावनासुद्धा तीव्र आहेत. या घटनेच्या मागील कारणांचा पोलिसांनी शोध घेण्याची गरज आहे. २०२१मध्येसुद्धा प्रफुल्लवर फायरिंग झाली होती. तेव्हा त्याचा सहकारी जखमी झाला होता. तेव्हा सत्तेवर असलेल्या महाविकास आघाडी सरकारने योग्य दखल घेतली नाही. वेळीच दखल घेतली असती, तर ही घटना टाळता आली असती, अशी प्रतिक्रिया कपिल पाटील यांनी दिली आहे.
...
गांभीर्याने तापास करा!
कपिल पाटील यांनी पोलिस उपअधीक्षक राहुल झालटे व वरिष्ठ पोलिस निरीक्षक हर्षवर्धन बारवे यांच्याकडून सुरू असलेल्या पोलिस तपासाची माहिती घेत अधिक गांभीर्याने पोलिस तपास करण्याच्या सूचना दिल्या.