कोलाड-माणगाव बायपाससाठी २१ कोटी!

कोलाड-माणगाव बायपाससाठी २१ कोटी!
खड्ड्यांच्या तक्रारींवर २४ तासांत कार्यवाही करा; अजित पवार यांचे आदेश
मुंबई, ता. १३ ः गणेशोत्सवानिमित्त कोकणात जाणाऱ्या लाखो गणेशभक्तांची गैरसोय होऊ नये, मुंबई-गोवा महामार्गावरील खड्ड्यांबाबत तक्रार येताच २४ तासांत कार्यवाही करण्याचे निर्देश उपमुख्यमंत्री अजित पवार यांनी दिले. तसेच या कामावर देखरेख ठेवण्यासाठी सार्वजनिक बांधकाम मंत्र्यांच्या अध्यक्षतेत समिती नेमण्यासह कोलाड ते माणगावदरम्यानच्या सर्व बायपासच्या कामासाठी २१.९० कोटींचा निधी मंजूर करण्यात आला.
मुंबई-गोवा महामार्गावरून दरवर्षी गणेशोत्सवासाठी लाखो गणेशभक्त कोकणात जातात. गणेशभक्तांची गैरसोय होऊ नये, म्हणून उपाययोजना करण्यासंदर्भात उपमुख्यमंत्री अजित पवार यांनी बुधवारी (ता. १३) बैठक घेतली. या वेळी सार्वजनिक बांधकाम मंत्री शिवेंद्रराजे भोसले, महिला व बालविकास मंत्री अदिती तटकरे, खासदार सुनील तटकरे यांच्यासह संबंधित अधिकारी आणि जनआक्रोश समितीचे पदाधिकारी उपस्थित होते. गणेशोत्सवापूर्वी मुंबई-गोवा महामार्गाची डागडुजी करणे व वाहतूक व्यवस्था सुरळीत करण्यासाठी ठोस उपाययोजना करण्याची भूमिका खासदार तटकरे यांनी या वेळी मांडली.
उपमुख्यमंत्री अजित पवार यांनी यासंदर्भात धोरणात्मक निर्णय घेत ज्या ठिकाणी बोगद्यांच्या अपूर्ण कामामुळे वाहतुकीचा खोळंबा होत आहे, अशा कोलाड ते माणगांवदरम्यानच्या सर्व बायपाससाठी २१ कोटी ९० लाख रुपयांचा निधी मंजूर केला. ही कामे तातडीने पूर्ण करण्याचे निर्देश दिले. सार्वजनिक बांधकाम मंत्र्यांच्या अध्यक्षतेखालील समितीने ही सर्व कामे पूर्ण होईपर्यंत त्यावर देखरख करण्याची सूचना केली. महामार्गावर खड्ड्यांबाबत प्रवाशांच्या तक्रारी नोंदवून घेण्यासाठी हेल्पलाइन सुरू करावी आणि तक्रार येताच २४ तासांत त्यावर कार्यवाही करावी, असे निर्देश दिले.