मराठी एकिकरण समितीच्या आंदोलकांची पोलीसांनी घेतले ताव्यात

जैन आंदोलकांवर कारवाई का नाही?
कबुतरखाना प्रकरणात एकीकरण समितीच्या आंदोलकांची धरपकड
सकाळ वृत्तसेवा
मुंबई, ता. १३ ः न्यायालयाच्या आदेशानंतर दादरचा कबुतरखाना बंद केला याविरोधात जैन आंदोलकांवर पोलिसांनी कोणती कारवाई केली, असा सवाल करीत मराठी एकीकरण समितीने बुधवारी दादर कबुतरखाना परिसरात आंदोलन केले. पोलिसांनी आंदोलकांची धरपकड करीत त्यांना ताब्यात घेतले. दरम्यान, या सर्व प्रकारामुळे परिसरात तणावाची परिस्थिती निर्माण झाली होती.
उच्च न्यायालयाच्या आदेशानंतर महापालिकेने दादरचा कबुतरखाना बंद केल्यानंतर एका विशिष्ट समाजाने विरोध केला होता. त्याविरोधात मराठी एकीकरण समितीने बुधवारी आंदोलनाचा इशारा दिला होता. तत्पूर्वी पोलिसांनी काही आंदोलकांना नोटिसाही बजावल्या होत्या. अनेक आंदोलक सकाळपासूनच कबुतरखान्याजवळ जमले. डोक्यावर टोप्या घालत त्यांनी घोषणा केली. आंदोलनाच्या पार्श्वभूमीवर परिसराला पोलिस छावणीचे स्वरूप आले होते. परिसरातील नागरिकही या आंदोलनाला पाठिंबा देताना दिसत होते. दरम्यान, अवघ्या काही वेळातच पोलिसांनी आंदोलकांना ताब्यात घेण्यास सुरुवात केली.
----
जातीय रंग देऊ नका?
एका विशिष्ट समाज, धर्माचे नाव घेऊन कायदा आणि सुव्यवस्था बिघडवली जात आहे. शस्त्रे काढू, मोर्चे काढू वगैरे भाषा करून सामाजिक शांतता बिघडवली जात आहे. त्यांना वेळीच आवर घालावा अन्यथा आम्हालाही मोर्चे काढावे लागतील. कबुतरखाना बंदीचा विषय धार्मिक नाही. या विषयाला जातीयवादाचा रंग देऊ नका. जैन समाजाने कबुतरखान्यावरील बंदीविरोधात आंदोलन केले, तेव्हा त्यांच्यावर कारवाई केली का, असा सवाल आंदोलकांनी पोलिसांना केला.
----
विषय धर्माचा नसून आरोग्याचा आहे
पोलिसांनी आम्हाला आमची भूमिका मांडू द्यावी. आम्ही फक्त आमचे म्हणणे मांडायला आलो आहोत. पोलिसांनी ही दडपशाही थांबवावी. चाकू-सुऱ्या घेऊन जैन समाजाने आंदोलन केले, तेव्हा पोलिस कुठे होते? कोणी कायदा-सुव्यवस्था हातात घेतला तर आम्हीही महामोर्चा काढू. हा विषय धर्माचा नसून आरोग्याचा आहे, अशी भूमिका मराठी एकीकरण समितीचे अध्यक्ष गोवर्धन देशमुख यांनी या वेळी मांडली.
----
जैन मंदिर बंद
मराठी एकीकरण समितीच्या आंदोलनाच्या पार्श्वभूमीवर कबुतरखाना परिसरातील दुकाने दुपारपर्यंत बंद ठेवण्यात आली होती. जैन मंदिराचा मुख्य दरवाजाही बंद ठेवण्यात आला होता.