रेल्वे रुळांवर मृतदेह; वेळापत्रक कोलमडले

रेल्वे रुळांवर मृतदेह; वेळापत्रक कोलमडले

बदलापूर, ता. १३ (बातमीदार) ः बदलापूर रेल्वे स्थानकात सकाळी रेल्वे प्रवाशांचा मोठा संताप व्यक्त होत होता. ऐन गर्दीच्या वेळी लोकल २५ ते ३० मिनिटे उशिराने धावत असल्याने, बदलापूरकरांचे प्रचंड हाल झाले. बदलापूर ते वांगणी रेल्वे स्थानकादरम्यान रेल्वे रुळावर एक व्यक्ती मूर्च्छित अवस्थेत आढळल्याने, बदलापूरहून मदत मागवून या व्यक्तीला रेल्वे रुळावरून बाजूला करेपर्यंत, कर्जतहून मुंबईकडे जाणाऱ्या अनेक लोकल खोळंबल्या.
मूर्च्छित व्यक्तीला ग्रामीण रुग्णालयात नेण्यात आले असता डॉक्टरांनी मृत घोषित केले. संबंधित व्यक्तीचा लोकलमधून पडून किंवा लोकलचा धक्का लागून मृत्यू झाल्याचा प्राथमिक अहवाल आहे; मात्र अद्याप या व्यक्तीची ओळख पटलेली नाही, असे रेल्वे पोलिसांनी सांगितले. त्यामुळे बदलापूरकरांचे आज मोठे हाल झाले. सकाळी ८.२५ मिनिटांची लोकल बदलापूर रेल्वे स्थानकात नऊ वाजता आली, पुढील सगळ्याच लोकलचे वेळापत्रक कोलमडले. त्यामुळे कर्जतहून मुंबईच्या दिशेला जाणाऱ्या लोकल जवळपास अर्धा तास उशिराने धावत होत्या. कामावर पोहोचायला उशीर होणार असल्याने बदलापूर स्थानकात गर्दीने मोठा संताप व्यक्त केला.