‘सकाळ श्रावण सरी’त महिलांच्या कलागुणांना व्यासपीठ

‘सकाळ श्रावण सरी’त महिलांच्या कलागुणांना व्यासपीठ
मुंबईसह नवी मुंबईत रंगणार पारंपरिक सोहळा; यंदा मॉडर्न मंगळागौरचे विशेष आकर्षण
मुंबई, ता. १३ : श्रावण सुरू झाला की सण, सोहळे आणि महिलांच्या उत्साहाला उधाण येते. महिलांच्या कलागुणांना व्यासपीठ मिळावे आणि त्यांचा सणासुदीचा उत्सव अधिक खास व्हावा, या हेतूने ‘सकाळ’तर्फे दरवर्षी आयोजित करण्यात येणारा ‘सकाळ श्रावण सरी’ सोहळा यंदाही मुंबई, नवी मुंबईमध्ये मोठ्या उत्साहात पार पडणार आहे. यंदाचे हे चौथे वर्ष असून, येत्‍या बुधवारी (ता. २०) बी. एन. वैद्य हाॅल, राजा शिवाजी विद्यासंकुल, दादर पूर्व येथे हा कार्यक्रम पार पडणार आहे. तसेच गुरुवारी (ता. २१) साहित्‍य मंदिर हॉल, सेक्‍टर-६ वाशी येथे या कार्यक्रमाचे आयोजन केले आहे.
महिलांच्या कलागुणांना प्रोत्साहन मिळावे, त्यांना स्वतःला व्यक्त करण्यासाठी एक व्यासपीठ उपलब्ध व्हावे आणि केवळ मनोरंजन नव्हे तर आर्थिक, शैक्षणिक क्षेत्राबाबतही जागरूक राहावे यादृष्टीने ‘सकाळ’ नेहमीच नवनवीन उपक्रम राबवित असते. ‘सकाळ श्रावण सरी’चे यंदाचे हे चौथे वर्ष. १७ ऑगस्टपासून ठाणे, दादर, कल्याण, वाशी, पुणे, पिंपरी-चिंचवड, नाशिक, कोल्हापूर, नागपूर आणि संभाजीनगर अशा १० शहरांमध्ये ‘सकाळ श्रावण सरी’ हा सोहळा रंगणार आहे.
सणांची उधळण आणि स्पर्धांची रेलचेल असलेल्या या पारंपरिक सोहळ्यात मंगळागौर सादरीकरण, श्रावण क्‍वीन (पाने, फळे, फुले, भाज्या यांचा साज) सोसायटी टी टाईम मी टाईम स्पर्धा, गाणी, नृत्य, बक्षिसांची लयलूट आणि बरेच आकर्षण असणार आहे.
कार्यक्रमासाठी एचडीएफसी म्युच्युअल फंड (फायनान्शियल लिट्रसी पार्टनर), सहयोगी प्रायोजक गोदरेज, महाराष्ट्र प्रदूषण नियंत्रण मंडळ, ब्रेव्हरेज पार्टनर सोसायटी टी, ट्रॅव्हल पार्टनर केसरी टूर, तनिष्का आणि इव्हेंट पार्टनर मी मुक्ता यांचे सहकार्य लाभले आहे.
एचडीएफसी म्युच्युअल फंड, त्यांच्या ‘बरणी से आझादी’ गुंतवणूकदार शिक्षण आणि जागरूकता उपक्रमाद्वारे, म्युच्युअल फंडांबद्दल जागरूकता पसरवणार आहेत. हा उपक्रम लोकांना पैसे बरणी /डब्यात साठवण्यापलीकडे जाऊन माहितीपूर्ण, दीर्घकालीन गुंतवणूक पर्यायांचा शोध घेण्यास प्रोत्साहित करतो. हे पूर्णपणे शैक्षणिक उद्देशांसाठी आहे. याशिवाय सोसायटी टीमुळे मैत्रिणींबरोबर एकत्र चहा प्यायची संधी मिळणार आहे.

केव्हा : २० ऑगस्ट २०२५
कधी : दुपारी ३.३० ते सायंकाळी ७.३०
कुठे : बी. एन. वैद्य हाॅल, राजा शिवाजी
विद्यासंकुल, दादर पूर्व

केव्हा : २१ ऑगस्ट २०२५
कधी : दुपारी ३.३० ते सायंकाळी ७.३०
कुठे : साहित्य मंदिर हॉल सेक्टर-६ वाशी