महापालिकेत कोंबड्या सोडणार!

महापालिकेत कोंबड्या सोडणार!

कल्याण, ता. १३ (वार्ताहर) : केडीएमसी क्षेत्रात १५ ऑगस्ट रोजी चिकन-मटण विक्रीवरून मोठा वादंग निर्माण झाला असताना काँग्रेस आणि मनसेदेखील या विषयावर आक्रमक झाली आहे. हा निर्णय मागे न घेतल्यास महापालिकेत कोंबड्या सोडण्याचा इशारा काँग्रेस जिल्हाध्यक्ष सचिन पोटे यांनी दिला आहे. ही बंदी करून आयुक्तांना अभिनव पोल्ट्री फार्म सुरू करायचा आहे का, असा सवाल मनसेचे माजी नगरसेवक मनोज घरत यांनी उपस्थित केला आहे.
काँग्रेसचे जिल्हाध्यक्ष सचिन पोटे यांनी आज महापालिका अधिकाऱ्यांची भेट घेतली. या वेळी हा निर्णय म्हणजे नागरिकांच्या स्वातंत्र्यावर घाला घालण्याचा प्रयत्न असल्याचे सांगत महापालिकेत कोंबड्या सोडू, असा इशारा प्रशासनाला दिला आहे. या निर्णयावर मनसेदेखील आक्रमक झाली असून, असे फालतू धार्मिक निर्णय घेत बसू नका, मटण-चिकन जप्त करून अभिनव पोल्ट्री फार्म उभारणार का, असा सवाल मनसेचे माजी नगरसेवक मनोज घरत यांनी उपस्थित करत वेळ वाया घालवू नका कल्याण डोंबिवलीमध्ये पावसामुळे पडलेले खड्डे, रस्त्यांची दुरवस्था झाली आहे त्याकडे लक्ष द्या, असा सल्ला दिला.