मुख्यमंत्री फडणवीस यांच्या हस्ते आज लोकार्पण

सागरी मार्गावरील पादचारी
भुयारी मार्ग हाेणार खुले

मुख्यमंत्री फडणवीस यांच्या हस्ते आज उद्‌घाटन
सकाळ वृत्तसेवा
मुंबई, ता. १३ : सागरीकिनारा मार्ग प्रकल्पातील ५.२५ किलोमीटर लांबीची लोकांना फिरण्यासाठी मोकळी जागा, चार पादचारी भुयारी मार्गाचे उद्‌घाटन मुख्यमंत्री देवेंद्र फडणवीस यांच्या हस्ते गुरुवारी (ता. १४) दुपारी १२.३० वाजता दूरदृश्यप्रणालीद्वारे होणार आहे.  वांद्रे (पूर्व) येथे मुंबई महानगर प्रदेश विकास प्राधिकरणाच्या नवीन प्रशासकीय इमारतीतून हा सोहळा ऑनलाइन होणार आहे.
केंद्रीय वाणिज्य व उद्योगमंत्री पीयूष गोयल, उपमुख्यमंत्री एकनाथ शिंदे, उपमुख्यमंत्री अजित पवार, सांस्कृतिक कार्यमंत्री आशीष शेलार, कौशल्य, रोजगार, उद्योजकता व नावीन्यता मंत्री मंगलप्रभात लोढा यांच्यासह पालिका आयुक्त भूषण गगराणी आदी उपस्थित राहणार आहेत. फिरण्यासाठीच्या मोकळ्या जागेत प्रवेश विनामूल्य आहे. भुयारी मार्ग क्रमांक ४ येथे येण्यासाठी भुलाभाई देसाई मार्गावरील आकृती पार्किंग इमारत येथून प्रवेश देण्यात आला आहे.  भुयारी मार्ग क्रमांक ६ येथे येण्यासाठी वत्सलाबाई देसाई चौक (हाजी अली जंक्शन) येथून प्रवेश देण्यात आला आहे. भुयारी मार्ग क्रमांक ११ येथे येण्यासाठी खान अब्दुल गफार खान मार्गावरील वरळी दुग्धशाळेसमोर प्रवेश देण्यात आला आहे. तसेच भुयारी मार्ग क्रमांक १४ येथे येण्यासाठी वरळीतील बिंदुमाधव ठाकरे चौक या ठिकाणाहून प्रवेशाची सोय आहे. 
.....
उद्यापासून सागरी मार्ग २४ तास खुला
लोकांसाठी असलेल्या मोकळ्या जागेचे क्षेत्र आणि पादचारी भुयारी मार्ग हे १५ ऑगस्टपासून सायंकाळी ४.३० वाजेपासून खुले करण्यात येणार आहेत. सागरीकिनारा मार्ग (दक्षिण) सध्या सकाळी ७ ते रात्री १२ या वेळेत वाहतुकीसाठी खुला असतो. शुक्रवारी (ता. १५) मध्यरात्रीनंतर हा रस्ता वाहतुकीसाठी २४ तास खुला करण्यात येणार आहे.  

दिव्यांगांसाठी व्हिलचेअर सुविधा
नागरिकांसाठी विरंगुळा तसेच शारीरिक तंदुरुस्तीच्या अनुषंगाने पालिकेने विहार क्षेत्रावर विविध सोयीसुविधा दिल्या आहेत. फिरण्यासाठी मोकळ्या जागेत सायकल ट्रॅक तयार करण्यात आला आहे. निसर्गसौंदर्य न्याहळण्यासोबतच विहार क्षेत्रावर आसन व्यवस्थेचीही सोय करण्यात आली आहे.
--------------