हा जीवनातील सर्वोत्तम आनंद!

हा जीवनातील सर्वोत्तम आनंद!
सुनील गावसकर यांचे उद्‍गार; बालरुग्णांच्या पालकांशी संवाद

खारघर, ता. १३ (बातमीदार) : हृदयविकार असलेल्या बाळांची शस्त्रक्रिया यशस्वी झाल्याचे शब्द डॉक्टरकडून पालकांच्या कांनी पडल्यावर त्यांच्या चेहऱ्यावर दिसणारा आनंद मी जवळून पाहिला आहे. हा जीवनातील सर्वोत्तम आनंद आहे, असे उद्‍गार क्रिकेटपटू सुनील गावसकर यांनी खारघर येथील श्री सत्यसाई संजीवनी सेंटर फॉर चाइल्ड हार्ट केअर रुग्णालयात काढले. या वेळी डॉ. श्रीनिवास तसेच रोटरी क्लबचे पदाधिकारी उपस्थित होते.
खारघर येथील श्री सत्य साई संजीवनी सेंटर फॉर चाइल्ड हार्ट केअर रुग्णालयास सुनील गावसकर यांनी भेट देऊन बालरुग्ण व त्यांच्या कुटुंबीयांशी मनमोकळा संवाद साधला. रुग्णालयात हृदयविकार असलेल्या बाळांवर होणाऱ्या उपचारांसंदर्भात गावसकर त्यांना विचारले असता ते म्हणाले, की खारघर, रायपूर आणि इतर ठिकाणी सत्यसाई संजीवनी रुग्णालयात भेट दिली असता, ज्या वेळी बाळांना शस्त्रक्रियेसाठी अतिदक्षता विभागात दाखल केले जाते त्या वेळी बाहेर बसलेले पालक चिंतेने त्रस्त असतात; परंतु जेव्हा डॉक्टर बाहेर येऊन बाळावर शस्त्रक्रिया यशस्वी झाल्याचे बाळाच्या आईवडिलांना सांगतात त्या वेळी त्यांच्या चेहऱ्यावर दिसणारा आनंद मी जवळून पाहिला आहे. तो बाळाचा पुनर्जन्म असतो. विशेष म्हणजे या ठिकाणी उपचारासाठी येणारे पालक हे खूप गरीब आणि सर्वसामान्य कुटुंबांतील असतात. वेळीच उपचारामुळे अमूल्य जीवन पुन्हा मिळते याची प्रचीती येते, असेही ते म्हणाले. रुग्णालयाच्या वरिष्ठ सल्लागार आणि बालरोग हृदयरोग शस्त्रक्रिया विभागाच्या प्रमुख डॉ. प्रभात रश्मी म्हणाल्या, की या सगळ्या नाजूक, गुंतागुंतीच्या प्रक्रिया आहेत; परंतु यामुळे त्या बाळाचे आयुष्य वाचविता येते.
...
६१९ बालरुग्णांवर शस्त्रक्रिया
रोटरी क्लब ऑफ बॉम्बे एअरपोर्टच्या नेतृत्वाखाली ‘गिफ्ट ऑफ लाइफ’ प्रकल्पांतर्गत तसेच प्रकल्पाचे अध्यक्ष पीपी नितीन मेहता यांच्या मार्गदर्शनाखाली या शस्त्रक्रिया करण्यासाठी सुमारे १० कोटी रुपयांचा निधी उभारण्यात आला. जमा झालेल्या पैशातून ६१९ बालरुग्णांवर मोफत शस्त्रक्रिया करण्यात आल्याचे ट्रस्टच्या पदाधिकाऱ्यांनी सांगितले.