शेअर मार्केट गुंतवणुकीत सात लाखांची फसवणूक

अंबरनाथ, ता. १४ (वार्ताहर) : पूर्व येथील शिवाजीनगर पोलिस ठाण्याच्या हद्दीत शेअर मार्केटमध्ये पैसे गुंतवल्यास दुप्पट परतावा मिळेल, असे प्रलोभन दाखवून एका महिलेची तब्बल सात लाख २० हजार रुपयांची फसवणूक झाल्याचा प्रकार उघडकीस आला आहे. याप्रकरणी पती-पत्नीविरोधात गुन्हा दाखल करण्यात आला आहे.
सरिता बडोनी (वय ४८) यांनी दिलेल्या तक्रारीनुसार, १ जानेवारी २०२२ ते ५ नोव्हेंबर २०२३ या कालावधीत दीपाली व गोपाळ दामले या दाम्पत्याने त्यांच्या पतीशी ओळख वाढवून विश्वास संपादन केला. आरोपींनी शेअर मार्केटमध्ये गुंतवणूक केल्यास पैसे दुप्पट मिळतील, असे सांगून टप्प्याटप्प्याने सात लाख २० हजार रुपये घेतले. मात्र, ठरलेल्या वेळेत पैसे परत न केल्याने फसवणुकीचा प्रकार उघड झाला. शिवाजीनगर पोलिसांनी दोघांविरोधात गुन्हा नोंदवला आहे. पुढील तपास पोलिस उपनिरीक्षक के. बी. हसगुळे करत आहेत.