अंबरनाथमध्ये ‘हर घर तिरंगा’ उपक्रम रंगतदार

अंबरनाथ, ता. १४ (वार्ताहर) : ‘हर घर तिरंगा’ या उपक्रमाला अंबरनाथमध्ये रंगत आणण्यासाठी बचत गटांच्या महिलांनी खास उपक्रम राबवला. नगरपालिकेच्या कार्यक्रमात महिलांसाठी रांगोळी स्पर्धा, झेंड्यांची विक्री; तसेच विणकाम व कलाकुसरीच्या वस्तूंचे विक्री प्रदर्शन भरवण्यात आले होते.
हर घर तिरंगा मोहिमेअंतर्गत नगरपालिकेत बचत गटांच्या महिलांसाठी विविध उपक्रम राबवण्यात आले. मुख्याधिकारी तथा प्रशासक उमाकांत गायकवाड यांच्या मार्गदर्शनाखाली बुधवारी (ता. १३) महिलांनी स्वहस्ते केलेल्या वस्तूंचे स्टॉल व रांगोळी स्पर्धा घेण्यात आली. या उपक्रमात विविध बचत गटांच्या महिलांनी पारंपरिक व देशभक्तीपर रांगोळ्या पालिकेत काढल्या होत्या. झेंडे, हातकलेच्या वस्तू, घरगुती उत्पादने असा स्टॉल लावले होते. उपक्रमाला नागरिकांचा उत्स्फूर्त प्रतिसाद मिळाला. स्वावलंबन आणि देशभक्तीचा संगम साधणारा हा उपक्रम ‘हर घर तिरंगा’ मोहिमेला एक वेगळा रंग देणारा ठरला. पालिकेचे एकूण ९४५ महिला बचत गट असून, यातील तुळजाई, पदामा, स्वामींनी, मंगलमूर्ती, दर्शना, तेनाज अशा सहा बचत गट यामध्ये सहभागी झाले होते. यावेळी सांस्कृतिक कार्यक्रम घेण्यात आले होते.