महिलेचे मतदारयादीत सहा वेळा नाव

महिलेचे मतदारयादीत सहा वेळा नाव
नालासोपाऱ्यातील प्रकाराने खळबळ

विजय गायकवाड ः सकाळ वृत्तसेवा
नालासोपारा, ता. १४ : लोकसभेचे विरोधी पक्षनेता राहुल गांधी यांनी मतचोरीच्या प्रकरणावरून संपूर्ण देशात रान उठविले असताना नालासोपारा विधानसभा मतदारसंघात एका मतदारयादीत एकाच महिलेचे सहा वेळा फोटोसह नाव असल्याची बाब चर्चेत आली असून, यामुळे मोठी खळबळ माजली आहे.
नालासोपारा पश्चिमेतील पाटणकर पार्क परिसरातील मतदारयादीत सुषमा गुप्ता या महिलेचे सहा वेळा नाव आले आहे. सहाही वेळा या महिलेचा फोटो आणि नाव सारखेच आहे. मात्र त्या नावाचा एपिक नंबर मात्र वेगवेगळा आहे. नालासोपारा पश्चिमेतील मतदारयादीत हे नाव आहे. त्यावर दाखवलेला पत्ता हा नालासोपारा पूर्व, जीवदानी चाळ येथील आहे.
बहुजन विकास आघाडीचे माजी सभापती अतुल साळुंखे यांनी हा गोंधळ यापूर्वीच बाहेर काढला होता. एका निवेदनाद्वारे निवडणूक आयोगाला याची माहितीही दिली; तरीही लोकसभा, विधानसभा आणि आता महापालिका निवडणुकीसाठी असणाऱ्या मतदारयादीत या महिलेचे नाव तसेच कायम असल्याचे त्यांना आता पुन्हा लक्षात आले. यामुळे निवडणूक विभागाच्या कार्यक्षमतेवरच प्रश्नचिन्ह निर्माण झाले आहे. अशाच प्रकारे प्रत्येक प्रभागनिहाय यादीत चुकीची, प्रभागाव्यतिरिक्त, बाहेरच्या मतदारांची नावे टाकल्याचा, एका मतदारयादीत दीडशे ते दोनशे नावे दोन वेळा, तीन वेळा आली असून, नालासोपारा विधानसभा मतदारसंघात ५० ते ६० हजार मतदान वाढविले आहेत आणि बोगस मतदान करून योग्य उमेदवाराला पराजित करण्याचे काम केले जात असल्याचा आरोप अतुल साळुंखे यानी केला आहे.
...
नाव कमी करणार!
पालघर जिल्हाधिकारी प्रशासन या प्रकारामुळे खडबडून जागे झाले आहे. मतदान ओळखपत्र न आल्याने या महिलेने आपला मतदान अर्ज अनेक वेळा ऑनलाइन भरल्याने तिचे सहा वेळा नाव आले आहे. आम्ही याची माहिती मिळाल्यानंतर अधिकाऱ्यांना सूचना देऊन नाव कमी करण्यासाठी तसे अर्ज भरून घेतले आहेत, अशी माहिती पालघरचे उपजिल्हाधिकारी तेजस चव्हाण यांनी सांगितले.