मुंबई-अहमदाबाद महामार्गावर टँकरला भीषण अपघात

मुंबई-अहमदाबाद महामार्गावर टँकरला भीषण अपघात
मनोर, ता. १४ (बातमीदार) : मुंबई-अहमदाबाद महामार्गावर ढेकाळे गावाच्या हद्दीत वाघोबा खिंडीत वळणावर एक इथेनॉल भरलेला टँकर चालकाचे नियंत्रण सुटल्याने २० फूट खोल दरीत कोसळला. या अपघातात टँकरचालक जखमी झाला असून, त्याच्यावर खासगी रुग्णालयात उपचार सुरू आहेत. सकाळी सहाच्या सुमारास घडलेल्या या अपघातात टँकरमध्ये भरलेले २० हजार लिटर ज्वलनशील इथेनॉल रस्त्यावर गळत असल्याचे निदर्शनास आल्यानंतर परिसरात आग लागण्याचा धोका निर्माण झाला होता.
वसई-विरार महापालिकेचा अग्निशमन बंब तत्काळ घटनास्थळी दाखल होत महामार्ग सुरक्षा विभाग व अग्निशमन दलाच्या मार्गदर्शनाखाली क्रेनच्या सहाय्याने टँकर बाहेर काढण्याचे काम सुरू केले. रसायनाची गळती थांबवण्यासाठी टँकर उभा करण्यात आला. अपघातग्रस्त टँकरमधील इथेनॉल दुसऱ्या टँकरमध्ये खाली करण्याचे काम सुरू केले. दरम्यान, गुजरातकडे जाणाऱ्या दोन मार्गिकांवर वाहतूक रोखण्यात आली, तर एकेरी वाहतूक सुरू होती. सुरक्षा कारणास्तव गळती थांबवून रसायन दुसऱ्या टँकरमध्ये भरले. टँकर रिकामा झाल्यावर क्रेनच्या सहाय्याने बाहेर काढण्यात येईल, अशी प्रतिक्रिया महामार्ग सुरक्षा विभागाचे प्रभारी अधिकारी पवन ठाकूर यांनी दिली.