केळव्यामध्ये बिबट्याचा वावर

केळव्यामध्ये बिबट्याचा वावर
नागरिकांमध्ये भीतीचे वातावरण
पालघर, ता. १४ (बातमीदार) : केळवे करंद आळी येथे बुधवारी (ता. १३) रात्री एका घरामध्ये बसवलेल्या सीसीटीव्हीमध्ये बिबट्याचा वावर कैद झाल्याची घटना समोर आली आहे. यामुळे गावामध्ये भीतीचे वातावरण निर्माण झाले आहे. वन विभागाने परिसराची त्वरित पाहणी केली असता बिबटा कुठेही आढळला नाही.

केळवे करंजाळी परिसरात राहणारे हार्दिक सावे यांच्या घरी बसवलेल्या सीसीटीव्हीमध्ये रात्री १० वाजताच्या सुमारास रस्त्यावरून बिबट्या फिरताना दिसला. त्यांनी या घटनेची माहिती पोलिसांना दिली. त्यानंतर पोलिसांनी वन विभागाला सूचना केली. त्यानंतर पोलिस आणि वन विभागाचे प्राणिमित्र यांनी संपूर्ण परिसर पिंजून काढण्याचे काम केले. बिबट्याच्या वावराचे ठसे काही ठिकाणी आढळले असले, तरी रात्रीच्या अंधारात आणि पावसाच्या वातावरणात तो दिसला नाही. या भागातील बागायतदार आपल्या बागांमध्ये भाजीपाला, पानवेली अशी लागवड करतात. त्यामुळे बिबट्याचा वावर असणे तिथे नेहमीच संभव आहे. बिबट्याच्या वावरामुळे नागरिकांमध्ये भीती पसरली असून, वन विभाग त्याचा शोध घेत आहे. अद्याप त्याचा शोध लागलेला नाही.