घाटकोपर पोलीस ठाण्याचे वरिष्ठ पोलिस निरीक्षक सतीश जाधव यांना राष्ट्रपती पोलिस पदकाचा मान

सतीश जाधव यांना राष्ट्रपती पोलिस पदक
घाटकोपर, ता १४ (बातमीदार) ः घाटकोपर पोलिस ठाण्यात वरिष्ठ पोलिस निरीक्षक म्हणून कार्यरत असलेले सतीश भगवान जाधव यांची राष्ट्रपती पोलिस पदकासाठी निवड झाली आहे. त्यांना हा प्रतिष्ठेचा मान त्यांच्या उत्कृष्ट, निष्ठावान व उल्लेखनीय सेवेसाठी प्रदान करण्यात येणार आहे.
मुंबई, अमरावती, नवी मुंबई, ठाणे आणि विशेष सुरक्षा विभाग या विभागांमध्ये कार्यरत असताना त्यांनी गुन्हेगारी प्रवृत्तीला आळा घालणे, कायदा व सुव्यवस्था राखणे आणि जनतेमध्ये विश्वास निर्माण करणे यासाठी सातत्याने प्रभावी कार्य केले. त्यांच्या या कार्यक्षमतेची दखल घेत त्यांना सन २०२२ साली महाराष्ट्र पोलिस दलातर्फे महासंचालकांचे पोलिस पदक प्रदान करण्यात आले होते.