माहिती अधिकार कार्यकर्त्याच्या जीव धोक्यात

बदलापूर, ता. १४ (बातमीदार) : बदलापूर नगरपालिकेच्या अभियंत्यांकडून माहितीच्या अधिकारात अर्ज करणाऱ्यांची ओळख उघड होत असल्याचा गंभीर आरोप माहिती अधिकार कार्यकर्ते संजय वानखेडे यांनी केला आहे. त्यांच्या मते, पालिकेत सादर केलेला त्यांचा अर्ज थेट शहरातील एका नामांकित व्यक्तीकडे पोहोचला आहे. त्या व्यक्तीने मोबाईलवरून तो दाखवून त्यांना दमदाटी केली.
पूर्वीही अतिक्रमण विभागातून तक्रारदारांची माहिती, तक्रार झालेल्या व्यक्तीकडे उघड केल्याच्या घटना समोर आल्या आहेत. आता पुन्हा एकदा पालिकेच्या अभियंत्यांकडून माहितीचा अधिकार टाकणाऱ्या कार्यकर्त्यांचा अर्ज उघड करण्यात येत आहे. यामुळे माहिती अधिकार कार्यकर्त्याच्या जीवाला धोका निर्माण झाला आहे. कवठ्याची वाडी परिसरातील रस्त्याच्या कामासंदर्भात पुढाकार घेणारे आणि ही समस्या समाज माध्यमांसोबत मांडणाऱ्या संजय वानखेडे यांनी माहितीचा अधिकार अर्ज कुळगाव बदलापूर नगरपालिकेत सादर केला होता. मात्र, या अर्जाचा फोटो शहरातील एका नामांकित व्यक्तीच्या मोबाईलमध्ये होता. त्याने वानखेडे यांना बोलावून यासंदर्भात दमदाटी करून अर्ज मागे घेण्यास सांगितले. वानखेडे यांनी याबाबत स्पष्ट नकार दिला. माझा माहितीचा अधिकार पालिकेतून उघड कसा होतो? असा प्रश्न बांधकाम विभागाच्या अभियंत्यांकडे मांडला आहे. त्याचबरोबर या संदर्भात मुख्याधिकारी मारुती गायकवाड यांच्याकडे तक्रार केली आहे. माझ्या आणि माझ्या कुटुंबाच्या जीवाला धोका असून, पालिकेच्या ज्या अधिकाऱ्यांनी व किंवा अभियंत्याने हा अर्ज उघड केला आहे. त्यांच्यावर चौकशीअंती गोपनीयतेचा भंग केल्यासंदर्भात कारवाई करण्याची मागणी वानखेडे यांनी केली आहे.

काही दिवसांपूर्वी पालिकेत माहितीच्या अधिकारासंदर्भातील अर्ज दिल्यानंतर, हा अर्ज शहरातील एका नामांकित व्यक्तीच्या मोबाईलमध्ये आढळला. त्याने या संदर्भात दमदाटी करत हा अर्ज मागे घेण्यास सांगितले. मात्र, आदिवासींच्या प्रश्नासंदर्भात मी सदैव पाठपुरावा करत असून, अर्ज मागे घेणार नाही. पालिकेचे अधिकारी किंवा अभियंता गोपनीयतेचा भंग करून सामान्य कार्यकर्त्यांची ओळख उघड करत असतील तर अधिकारी आणि अभियंत्यांवर कठोर कारवाई होऊन आळा बसला पाहिजे.
- संजय वानखेडे, माहिती अधिकार कार्यकर्ता

आमच्या विभागातून संबंधित व्यक्तीची ओळख किंवा त्यांनी सादर केलेला माहितीचा अधिकार उघड झालेला नाही. फक्त त्या संदर्भात शहरात चर्चा सुरू असेल म्हणून संजय वानखेडे यांनी तसा आरोप केला असेल.
- विनायक चौघुले, अभियंता
बांधकाम विभाग बदलापूर पालिका