निवडणूक कामात कामचुकारपणा करणाऱ्यांविरुद्ध कारवाई करणार

पालघर, ता. १४ (बातमीदार) : निवडणूक कामांमध्ये कसूर करणाऱ्यांविरुद्ध कारवाई करण्यात येणार असल्याचे निर्देश जिल्हाधिकारी डॉ. इंदूराणी जाखड यांनी दिले आहेत.
नालासोपारा विधानसभा क्षेत्रात एका महिलेचे एकापेक्षा अधिक ठिकाणी नाव नोंदले गेल्याच्या प्रकरणात सर्व दुबार नावे रद्द करून या महिला मतदाराची दुबार नावे वगळण्यात आली असून, संबंधित मतदान केंद्रस्तरीय अधिकारी व इतर निवडणूक कर्मचाऱ्यांना कामात कसूर केल्यास कारवाई करण्यात येईल, अशा सूचना दिल्या आहेत.
१३२ नालासोपारा मतदारसंघात सुषमा गुप्ता यांनी जानेवारी २०२४च्या आसपास मतदार यादीत नाव नोंदवण्यासाठी नोंदणीचा फॉर्म क्रमांक ६ ऑनलाइन पद्धतीने दाखल केला. ऑनलाइन फॉर्म भरल्यानंतर त्वरित कार्ड मिळेल, असा त्यांचा समज होता. तथापि, हा अर्ज केल्यानंतर एपिक कार्ड त्वरित न मिळाल्याने त्यांनी गैरसमजुतीतून नव्याने ऑनलाइन पद्धतीने मतदार नोंदणीचा फॉर्म क्रमांक ६ एकूण सहा वेळा भरला. नव्या नावाच्या नोंदी वगळण्यासाठी फॉर्म क्र. ७ भरून घेण्यात आला आहे.
जिल्ह्यातील इतर ठिकाणीदेखील दुबार मतदार शोधण्याचे काम हाती घेण्यात आले असून, दुबार नाव असणाऱ्या मतदारांनी नमुना अर्ज क्रमांक ७ भरून आपले मतदार यादीत नाव एकाच ठिकाणी ठेवण्याचे आवाहन जिल्हा निवडणूक विभागातर्फे करण्यात आले आहे. तसेच मतदार यादीच्या आगामी पुनरीक्षण कार्यक्रमातदेखील अशाच पद्धतीने दुबार दावे वगळण्यासाठी काटेकोर तपासणी व कार्यवाही करण्याच्या सूचनादेखील जिल्हा निवडणूक अधिकारी तथा जिल्हाधिकारी डॉ. इंदुराणी जाखड यांनी सर्व यंत्रणेला दिले आहेत.