एमएमआरडीएचा मुंबईच्या जोडणीला वेग!

मुंबईतील प्रवास अधिक वेगवान!
चार प्रकल्पांचे मुख्यमंत्र्यांच्या हस्ते उद्‍घाटन
सकाळ वृत्तसेवा
मुंबई, ता. १४ : मुंबईतील वाहतुकीचा वेग वाढावा, नागरिकांना एका ठिकाणाहून दुसऱ्या ठिकाणी सहज आणि वेळेत पोहोचता यावे, म्हणून मुंबई महानगर प्रदेश विकास प्राधिकरण (एमएमआरडीए) प्रयत्नशील आहे. वाहतुकीच्या दृष्टीने महत्त्वपूर्ण असलेले पायाभूत प्रकल्प वेगाने पूर्ण केले जात आहेत. त्यामुळे मुंबईतील कनेक्टिव्हिटीला गती मिळत असल्याचे गौरवोद्‍गार मुख्यमंत्री देवेंद्र फडणवीस यांनी काढले.
एमएमआरडीएने सांताक्रूझ-चेंबूर लिंक रोडवर वाकोला येथे उभारलेला केबल स्टे पूल, कलानगर येथील उप-उड्डाणपूल (आर्म-ड), मुंबई मेट्रो प्रशिक्षण संस्था, मालवणी येथील कर्मचारी निवासी इमारतीचे गुरुवारी मुख्यमंत्री देवेंद्र फडणवीस यांच्या हस्ते उद्‍घाटन करण्यात आले. त्याप्रसंगी ते बोलत होते. भारतातील पहिलाच तीव्र वळणाच्या केबल-स्टे पुलाचे काम पूर्ण होणे ही आपल्यासाठी अभिमानाची गोष्ट आहे. त्यामुळे पूर्व आणि पश्चिम द्रुतगती महामार्गांदरम्यानचा प्रवास अधिक सोपा होणार आहे. बीकेसीतून बाहेर पडण्याचे सहापैकी पाच मार्ग तयार झालेत. मेट्रोबाबत पंतप्रधानांनी मांडलेली ‘मुंबई ५९ मिनिटांत’ ही कल्पना साकार करायला तयार आहे. आपण मुंबईला अजून वेगवान, सुरक्षित आणि जागतिक दर्जाच्या सुविधा देत आहोत, असे फडणवीस यांनी या वेळी स्पष्ट केले. वांद्रे पूर्व येथील एमएमआरडीए मुख्यालयात झालेल्या कार्यक्रमाला उपमुख्यमंत्री एकनाथ शिंदे, अजित पवार, उपनगराचे पालकमंत्री अ‍ॅड. आशीष शेलार, एमएमआरडीए आयुक्त डॉ. संजय मुखर्जी, महापालिका आयुक्त भूषण गगराणी आदी उपस्थित होते.
----
एमएमआरडीएकडून सध्या मुंबई आणि परिसरात मेट्रोचे जाळे उभारले जात आहे. त्यामुळे भविष्यात लोकलसेवेवरील भार कमी होईल. तसेच मुंबई वाहतूक कोंडीमुक्त होताना दिसेल.
- एकनाथ शिंदे, उपमुख्यमंत्री
----
मुंबईच्या वाढत्या गरजा पूर्ण करण्यासाठी एमएमआरडीएने उभारलेले प्रकल्प म्हणजे फक्त काँक्रीट, स्टील आणि तंत्रज्ञानाचे नमुने नाहीत, तर मुंबईच्या भविष्यातील गती, गुणवत्ता आणि सुरक्षिततेची हमी आहेत.
- अजित पवार, उपमुख्यमंत्री