रेल्वेचा कारभार आम्ही ठरवू शकत नाही : न्यायालय

रेल्वेचा कारभार आम्ही
ठरवू शकत नाही : न्यायालय

दिवा-सीएसएमटी लाेकलची मागणी फेटाळली
सकाळ वृत्तसेवा
मुंबई, ता. १४ : दिव्यातील नागरिकांचा जीवघेणा प्रवास टाळण्यासाठी दिवा ते छत्रपती शिवाजी महाराज टर्मिनस (सीएसएमटी) दरम्यान लोकल सेवा सुरू करण्याची मागणी उच्च न्यायालयाने गुरुवारी (ता. १४) फेटाळून लावली. न्यायालय या विषयातील तज्ज्ञ नसून रेल्वे प्रशासनाने कसा कारभार करावा, हे आम्ही ठरवू शकत नाही, अशी कानउघाडणी करून न्यायालयाने याचिका फेटाळली. या वेळी याचिकाकर्त्यांनी रेल्वे प्रशासनाकडे निवेदन करण्याची सूचनाही केली. 

याचिकाकर्त्यांनी नव्याने लोकल सेवा सुरू करण्यासाठी काही निकष आहेत का, याचा अभ्यास करावा. त्यानंतर लोकल सेवा सुरू करण्याबाबत रेल्वे प्रशासनाला तपशीलवार निवेदन सादर करा, अशी सूचना मुख्य न्या. आलोक आराधे आणि न्या. संदीप मारणे यांच्या खंडपीठाने याचिकाकर्त्यांना केली.
दिवा-सीएसएमटी लोकल सेवा सुरू करून दिवा स्थानकात मूलभूत सुविधा उपलब्ध करण्याचे आदेश मध्य रेल्वे प्रशासनाला देण्यासाठी याचिकाकर्ते अमोल केंद्रे यांच्या वतीने ही याचिका करण्यात आली होती.
----
याचिकाकर्त्याचे म्हणणे काय?
दिवा जंक्शन १८६७ मध्ये स्थापन झाले आहे. हे स्थानक हे मध्य रेल्वेवरील सर्वात वर्दळीच्या रेल्वेस्थानकांपैकी एक आहे. या स्थानकात मूलभूत सुविधांचा अभाव असून, येथील नागरिकांना गर्दीतून जीवघेणा प्रवास करावा लागतो. या पार्श्वभूमीवर २०१४ पासून दिवा ते सीएसएमटीदरम्यान लोकल सेवा सुरू करण्याची मागणी हाेत आहे. त्याकडे नेहमीच दुर्लक्ष केल्याचा आरोप याचिकेत करण्यात आला आहे.