आसनगावमध्ये रेल्वेचे पोलिस ठाणे सुरू

आसनगाव रेल्वेस्थानकात लोहमार्ग पोलिस ठाण्याचे उद्घाटन
शहापूर, ता. १६ (वार्ताहर) : मध्य रेल्वेच्या आसनगाव स्थानकात नव्याने स्थापन केलेल्या लोहमार्ग पोलिस ठाण्याचे उद्घाटन शुक्रवारी (ता. १५) पोलिस महासंचालक प्रशांत बुरडे यांच्या हस्ते दूरदृश्य प्रणालीद्वारे करण्यात आले.
आसनगावमध्ये पोलिस ठाण्याची गरज मोठ्या प्रमाणावर जाणवत होती. बदलापूर ते कसारादरम्यानच्या एकूण १६ स्थानकांवरील सुरक्षा व्यवस्था कल्याण येथील एकमेव लोहमार्ग पोलिस ठाण्याच्या अखत्यारीत होती. परिणामी, गुन्हा घडल्यास कल्याणपर्यंत प्रवास करून तक्रार दाखल करावी लागत होती. महिलांची छेडछाड, प्रवाशांचे सोने, दागिने व बॅगचोरी, मारामारी अशा अनेक घटनांमध्ये सातत्याने वाढ होत होती. या पार्श्वभूमीवर कल्याण- कसारा- कर्जत रेल्वे प्रवासी संघटनेने आसनगावमध्ये स्वतंत्र पोलिस ठाण्याची मागणी केली होती. त्यानुसार चार महिन्यांपूर्वी या ठाण्याला मंजुरी देण्यात आली होती. स्वातंत्र्यदिनाच्या औचित्याने या नव्या पोलिस ठाण्याचे उद्घाटन करण्यात आले.
या कार्यक्रमाला सहाय्यक पोलिस आयुक्त नंदराज पाटील, वरिष्ठ पोलिस निरीक्षक पंढरी कांदे, नव्याने नियुक्त वरिष्ठ पोलिस निरीक्षक सचिन मोरे, तसेच रेल्वे प्रवासी संघटनेचे पदाधिकारी राजेश घनघाव, विशाल जाधव, आरती भोईर, सचिन जाधव, आनंद ढोणे, सरपंच रवीना कचरे आणि रेल्वे पोलिस पथकाचे कर्मचारी उपस्थित होते.