देशाची वाटचाल हुकूमशाहीकडे

देशाची वाटचाल हुकूमशाहीकडे
मांसविक्री बंदीवरून आव्हाड यांचा हल्लाबोल

सकाळ वृत्तसेवा
डोंबिवली, ता. १५ : स्वातंत्र्यदिनाच्या निमित्ताने केडीएमसी प्रशासनाने मांसविक्रीवर घातलेल्या बंदीच्या निर्णयावरून महाराष्ट्रात राजकारण चांगलेच तापले आहे. राष्ट्रवादी काँग्रेस पक्ष शरद पवार गटाचे ज्येष्ठ नेते आणि माजी मंत्री आमदार जितेंद्र आव्हाड यांनी या निर्णयाविरोधात सरकार व प्रशासनावर जोरदार टीका केली. त्यांनी या निर्णयाला हुकूमशाही पद्धतीचा व समाजात फूट पाडणारे पाऊल असल्याचे म्हटले. तसेच आपल्या देशाची वाटचाल ही नॉर्थ कोरियाप्रमाणे हुकूमशाहीकडे सुरू असल्याची टीका करीत त्यांनी या निर्णयाविरोधात कल्याणमध्ये मांसाहारी स्नेहभोजन केले.
कल्याणातील खाटीक समाज आणि काँग्रेस पक्षाकडून केडीएमसी निर्णयाच्या विरोधात केडीएमसी मुख्यालयाबाहेर आंदोलन करण्यात आले. याच निषेधात्मक आंदोलनाचा भाग म्हणून कल्याण जिल्हा काँग्रेसचे जिल्हाध्यक्ष सचिन पोटे यांच्या पुढाकाराने मांसाहारी स्नेहभोजन कार्यक्रमाचे आयोजन करण्यात आले होते. येथील एका उपहारगृहात झालेल्या या कार्यक्रमाला काँग्रेससह उद्धव बाळासाहेब ठाकरे शिवसेना आणि राष्ट्रवादी काँग्रेस शरद पवार गटाचे पदाधिकारी आणि कार्यकर्ते सहभागी झाले होते. प्रसिद्धी माध्यमांशी बोलताना आव्हाड म्हणाले, की सरकारने मांसविक्रीवर बंदी घालणारा कोणताही अधिकृत नवा सरकारी नियम आणलेला नाही, ही फक्त एक शिफारस आहे, ज्यामध्ये कुठेही विक्रीवर बंदीचा उल्लेख नाही. त्यांनी प्रश्न उपस्थित केला, की जेव्हा मुंबई आणि ठाणे महापालिका यांनी असा कोणताही निर्णय घेतलेला नाही, तर कल्याणमध्येच हा निर्णय का? त्यांनी उत्तर कोरियाच्या राष्ट्राध्यक्षांचे उदाहरण देत सांगितले, की तिथे आठ प्रकारे केस कापण्याचे आदेश आहेत आणि आता भारतातही तसेच हुकूमशाही वातावरण निर्माण करण्याचा प्रयत्न सुरू आहे.