‘गडकरी’ जीवनाचा अविभाज्य भाग

‘गडकरी’ जीवनाचा अविभाज्य भाग!
नूतनीकृत वास्तूचे शिंदे यांच्या हस्ते लोकार्पण

सकाळ वृत्तसेवा
ठाणे, ता. १५ : राम गणेश गडकरी रंगायतन नाट्यगृह ही शान असून, या नाट्यगृहाच्या उभारणीमध्ये ठाणेकरांचे मोठे योगदान आहे. हे नाट्यगृह ठाणेकरांसह कलावंतांच्या जीवनाचा अविभाज्य भाग आहे, असे मत राज्याचे उपमुख्यमंत्री एकनाथ शिंदे यांनी व्यक्त केले. स्वातंत्र्यदिनाचे औचित्य साधत शुक्रवारी राम गणेश गडकरी रंगायतनच्या नूतनीकृत वास्तूचे लोकार्पण शिंदे यांच्या हस्ते करण्यात आले. या वेळी ते बोलत होते.
ही एक जिवंत वास्तू असल्याचेदेखील शिंदे यांनी या वेळी सांगितले.
‘राम गणेश गडकरी रंगायतन नाट्यगृह सुरू होण्याची जवळपास वर्षभर ठाणेकर रसिक वाट पाहात होते. आजअखेर या वास्तूत तिसरी घंटा वाजली. नाट्यगृहाची दुरुस्ती करीत असताना नाट्य कलावंतांच्या आणि कलाप्रेमींच्या सूचना महत्त्वाच्या होत्या. त्या सूचनांनुसार त्यात बदल करण्यात आले. त्यामुळे दुरुस्तीच्या कामाला अधिकचा वेळ लागला,’ असे शिंदे यांनी या वेळी सांगितले. ‘ठाण्यात बाळासाहेब ठाकरे यांची सभा होती, तेव्हा त्यांनी विचारले काय हवे. त्यावर एकाने सांगितले नाट्यगृह द्या. त्यातून ठाण्यात गडकरी रंगायतन आणि दादोजी कोंडदेव क्रीडागृह या दोन मोठ्या वस्तू ठाणे शहराला मिळाल्या, असेही ते म्हणाले.
१९७८मध्ये राम मराठे यांनी ४७ वर्षांपूर्वी गडकरी करायला नांदी सादर केली होती. त्यानंतर तब्बल ४७ वर्षांनी त्यांचे सुपुत्र मुकुंद मराठे यांनी नूतनीकृत गडकरी रंगायतनच्या उद्‍घाटनाच्या वेळेस नांदी सादर केली.
...
ठाण्यात उभारणार हापूस पार्क
काही दिवसांपूर्वी एका कार्यक्रमात सर्वोच्च न्यायालयाचे निवृत्त न्यायाधीश अभय ओक यांनी ठाण्यात पूर्वी रस्त्याने जाताना हापूस आंबे खायला मिळत होते, असे म्हटले. आता ठाण्यातच हापूस पार्क उभारले जाणार आहे, अशी माहिती एकनाथ शिंदे यांनी दिली.
...
कोंडीमुक्त ठाणे!
ठाण्यात येत्या सप्टेंबरअखेर १०.३० किमी मेट्रोची ट्रायल रन घेतली जाणार आहे. त्यानंतर डिसेंबरअखेर पूर्ण क्षमतेने मेट्रो सुरू होणार आहे. शिवाय अंतर्गत मेट्रोचे कामही सुरू होणार आहे. तसेच ठाण्यातून एलिव्हेटेड रोडही जात आहे. याशिवाय विकासाची अनेक कामे ठाण्यात सुरू आहेत. त्यामुळे ठाण्यात यापुढे वाहतूक कोंडी होणार नसल्याचा विश्वासही एकनाथ शिंदे यांनी या वेळी व्यक्त केला.
...
गडकरीमधून सुरुवात : अशोक हांडे
अखिल भारतीय मराठी परिषदेचे विश्वस्त अशोक हांडे यांनी त्यांच्या गडकरी नाट्यगृहाच्या आठवणींना उजाळा दिला. येथून १९७७मध्ये करिअरला सुरुवात केली असल्याचे हांडे यांनी सांगितले. तसेच ठाण्यात दंगल सुरू होती, त्या वेळी ‘मंगल गाणी दंगल गाणी’चा प्रयोग गडकरीत सुरू होता. त्या वेळेस कार्यक्रम संपेपर्यंत एकनाथ शिंदे खाली उभे होते, असेही ते म्हणाले. शिंदे यांचे व्हिजन गडकरीमध्ये दिसत असल्याचे मतही हांडे यांनी व्यक्त केले.