महापालिका निवडणुका मनसेसह लढणार

महापालिका निवडणुका मनसेसह लढणार
खासदार संजय राऊत यांची माहिती

सकाळ न्यूज नेटवर्क
मुंबई, ता. १५ : ‘मराठी भाषेच्या मुद्द्यावर एकत्र आलेले शिवसेना पक्षप्रमुख उद्धव ठाकरे व मनसेचे अध्यक्ष राज ठाकरे हे दोन्ही ठाकरे बंधू मुंबई, ठाणे, कल्याण-डोंबिवलीसह राज्यातील अनेक महापालिकांच्या निवडणुका एकत्र लढणार आहेत. त्याबाबत आमची चर्चा सुरू आहे,’ अशी माहिती खासदार संजय राऊत यांनी दिली.

खासदार संजय राऊत यांनी नाशिक येथे पत्रकारांशी बोलताना आगामी निवडणुकीबाबत भूमिका स्पष्ट करीत भाजपवरही हल्ला चढवला. जिल्हा परिषदेची निवडणूक कशा प्रकारे लढवायची, यावर आमचे मंथन झाले असून आम्ही ताकदीने जिल्हा परिषदा, नगर पंचायती लढणार आहोत. मुंबईसह अशा अनेक महापालिका आहेत, तेथे आमची एकमेकांसोबत चर्चा सुरू आहे. त्यांची ताकद ही मराठी माणसाच्या एकजुटीची असून, ती कायम राहणार आहे. आता कोणतीही अघोरी शक्ती आली तरी ही मराठी माणसाची वज्रमूठ तोडू शकत नाही, असेही राऊत यांनी स्पष्ट केले. देशाच्या स्वातंत्र्यलढ्याचा आणि खाण्या-पिण्यावरील बंधनाचा काय संबंध आहे, असा सवाल करीत ब्रिटिश सोडून गेले तेव्हाही त्यांनी अशी खाण्या-पिण्याची बंधने लादली नव्हती, असे सांगत राऊत म्हणाले, ‘आज धार्मिक सण नाही तर विजय उत्सव आहे. लोकांनी जे हवे ते खायचे, हवे ते प्यायचे, बेधुंद व्हायचे, असा स्वातंत्र्यदिनाचा सोहळा असायला पाहिजे. पण हा देश भाजपने धर्मांध केला. त्यांनी तालिबानी प्रवृत्तीचा धर्म इथे आचरणात आणण्यासाठी बंधने लादली,’ असा आरोप राऊत यांनी केला.