नवी मुंबई पालिका हद्दीत अनधिकृत बांधकामांचा सुळसुळाट.

नवी मुंबई पालिका हद्दीत अनधिकृत बांधकामांचा सपाटा
कोपरखैरणे आघाडीवर; पालिकेकडून यादी जाहीर
तुर्भे, ता. १६ (बातमीदार) : नवी मुंबई महापालिकेतर्फे एकीकडे शहरातील अनधिकृत बांधकामांना नोटिसा देण्याचे काम वेगाने सुरू आहे, तर दुसरीकडे शहरात अनधिकृत बांधकामे उभारण्याची कामेही त्याच वेगाने सुरू आहेत. नवी मुंबई महापालिकेच्या अतिक्रमण नियंत्रण विभागाच्या वतीने अशा बांधकामांचे सर्वेक्षण मागच्या महिन्यात करण्यात आले आहे. त्यानुसार या बांधकामांना नोटिसा देण्यात आल्या आहेत. महापालिकेने नुकतीच या बांधकामांची यादी जाहीर केली आहे. त्यात एकट्या कोपरखैरणे विभागात ७० ठिकाणी अनधिकृत बांधकामे सुरू आहेत. यात चार रुग्णालयांचा समावेश आहे.
नवी मुंबई शहरातील अनधिकृत बांधकामांबाबत उच्च न्यायालयाने नाराजी व्यक्त करीत यावर कारवाई करून त्याचा अहवाल सादर करण्याचे आदेश महापालिकेला दिले आहेत. शहरातील अनधिकृत बांधकामांबाबत आपली बाजू मांडताना शहरात पाच हजार अनधिकृत बांधकामे असल्याचे सांगितले आहे. त्यानुसार महापालिकेने मागच्या सहा महिन्यांपासून शहरातील अनधिकृत बांधकामांना नोटिसा द्यायला सुरुवात केली आहे. त्‍यानुसार शहरी भागातील एसएस टाईपमधील, एलआयजीमधील रहिवासी वसाहतींमध्ये झालेल्या बांधकामांना महापालिकेच्या वतीने अनधिकृत बांधकामाच्या नोटिसा बजावल्या आहेत. अजूनही काहींना नोटिसा पाठवल्या जात आहेत. पूर्वी बैठ्या चाळी असलेल्या एसएस टाईप आणि एलआजजीची घरे सध्या तीन ते चार मजली झाली आहेत. या घरांवर कारवाई नको, यासाठी रहिवाशांनी काही दिवसांपूर्वीच मोर्चा काढला होता.
एकीकडे अशी परिस्थिती असतानाही दुसरीकडे मात्र शहरात अनधिकृत बांधकामे जोरात सुरू आहेत. यात कोपरखैरणे विभाग आघाडीवर आहे. जुलै महिन्यात केलेल्या सर्वेक्षणात कोपरखैरणे विभागात ७० ठिकाणी अनधिकृत बांधकामे सुरू असल्याचे पालिकेने जाहीर केलेल्या नोटिशीमध्ये स्पष्ट झाले आहे. ही अनधिकृत बांधकामे एलआयजी, एसएस टाईप वसाहतींमध्ये सुरू आहेत. या बांधकामांना पालिकेने नोटिसा बजावल्या आहेत, मात्र यातील सर्व बांधकामांवर कारवाई करण्यात आलेली नाही. त्यामुळे इतर ठिकाणी नवी बांधकामे सुरू आहेत. त्यामुळे महापालिकेने ही बाब गांभीर्याने घेत कारवाई करावी, अशी मागणी करण्यात येत आहे.

एकूण ११० बांधकामे

जुलै महिन्यात अनधिकृत बांधकामांना नोटिसा बजावण्यात आल्‍या आहेत. यामध्ये बेलापूर, नेरूळ, वाशी प्रत्येकी दोन बांधकामे सुरू आहेत. तुर्भे १६, कोपरखैरणे ७०, घणसोली ६, ऐरोली १२, दिघा एकही बांधकाम सुरू नाही, असे अधिकृत बांधकामविरोधी विभागाने प्रसिद्ध केलेल्या यादीमध्ये म्हटले आहे.