खोपोली - खालापुरात भारतीय स्वातंत्र्य दिन मोठ्या उत्साहात साजरा

खोपोली-खालापुरात स्वातंत्र्य दिन उत्साहात
खोपोली, ता. १५ (बातमीदार) ः नगरपरिषद, पोलिस स्थानक, तालुका शिक्षण प्रसारक मंडळाच्या सर्व शाळा, नगरपालिका सर्व शाळा, खासगी शाळा, विविध शासकीय कार्यालये, खालापूर तहसील कार्यालय, पंचायत समिती कार्यालय व इतर सर्व ठिकाणी अमृतमहोत्सवी स्वातंत्र दिन उत्साहात साजरा करण्यात आला. या निमित्ताने खोपोली नगरपालिका व तहसील कार्यालयाकडून विविध क्षेत्रात उल्लेखनीय कामगिरी बजावणाऱ्या संस्था, क्रीडापटू व व्यक्तींचा विशेष सन्मान केला.
खोपोलीत पालिकेचे मुख्याधिकारी व प्रशासक डॉ. पंकज पाटील यांच्या हस्ते नगरपालिका पटांगणात ध्वजवंदनाचा मुख्य कार्यक्रम पार पडला. यावेळी माजी लोकप्रतिनिधी, सर्वपक्षीय नेते व विविध संस्थांचे पदाधिकारी आणि नागरिक मोठ्या संख्येने उपस्थित होते. तालुका शिक्षण मंडळच्या ध्वजारोहणचा कार्यक्रम जनता विद्याल पटांगणात पदाधिकारी, शिक्षक, कर्मचारी आणि विद्यार्थ्यांच्या उपस्थितीती झाला.
तहसीलदार कार्यालय पटांगणात तालुक्याचा मुख्य ध्वजारोहणचा कार्यक्रम नऊ वाजता पार पडला. प्रभारी तहसीलदार इंगळे यांच्या हस्ते ध्वजारोहणासहित अन्य कार्यक्रम झाले. यावेळी तालुक्यातील सर्व शासकीय अधिकारी, पोलिस अधिकारी, आजी -माजी लोकप्रतिनिधी व नागरिक उपस्थित होते. यावेळी रक्तदान शिबीर, माजी सैनिकांचा गौरवसहित क्रीडापटू व विविध क्षेत्रात उल्लेखनीय कामगिरी केलेल्यांचा गौरव करण्यात आला.

फोटो ओळ
खोपोली : नगरपालिकेत पंकज पाटील यांनी ध्वजारोहण केले.
सामाजिक संस्थेचा नगरपालिका प्रशासनातर्फे सन्मान करण्यात आला.