पेण परिमंडळात ग्रामसभेतून महावितरणच्या योजनांची माहिती

पेण परिमंडळात ग्रामसभेतून महावितरणच्या योजनांची माहिती
अलिबाग (वार्ताहर)ः केंद्र सरकारच्या पी. एम. सूर्यघर योजना, पी. एम. कुसुम योजनेची माहिती रायगड जिल्ह्यात असलेल्या वीज ग्राहकांना देण्यासाठी स्वातंत्रदिनानिमित्त महावितरण पेण मंडळ कार्यालयाकडून विविध ठिकाणी मेळावे घेऊन मार्गदर्शन करण्यात आले.
कार्यक्रमाची सुरुवात अधीक्षक अभियंता पेण मंडळ बिक्कड यांच्या हस्ते ध्वजारोहण करून झाली. या वेळी परिसरामध्ये वृक्षारोपण करण्यात आले. त्याचप्रमाणे अलिबाग येथील सावरसई, सपोळा गावात, पनवेल ग्रामीण येथील किरखिंडी गावात, रोहा, तांबडी, मोरबे, लोंनशी व वाली तसेच गोरेगाव विभागातील दिघी, महाड व इतर एकूण १५ गावांमध्ये झालेल्या ग्रामसभेत पंतप्रधान सूर्यघर मोफत वीज योजना, मॉडेल सोलर व्हिलेज व महावितरणच्या इतर योजनांचे सादरीकरण करण्यात आले. तसेच सर्वसाधारण या सर्व ग्रामसभेमध्ये नागरिकांनी मोठ्या संख्येने सहभाग नोंदवला. महाराष्ट्र शासनाने वृक्षारोपणाच्या दिलेल्या उद्दिष्टपूर्तीसाठी १५ ऑगस्टपर्यंत ३०० झाडांचे वृक्षारोपण मंडळामध्ये विविध कार्यालयामार्फत करण्यात आले. राहिलेले उद्दिष्ट पूर्ण करण्यासाठी २० ऑगस्टपर्यंत ठिकठिकाणी वृक्षारोपण करायचे नियोजित केलेले आहे. मुख्य अभियंता भांडुप परिमंडल संजय पाटील, अधीक्षक अभियंता धनराज बिक्कड यांच्या मार्गदर्शनाखाली कार्यकारी अभियंता प्रदीप दाळू, रामकृष्ण पाटील, शैलेश कुमार व विद्यासागर शिंदे यांनी ग्रामसभा घेऊन ग्राहकांना योजनांची माहिती देण्यासाठी धडक मोहीम राबिवली.