संततधारेने भुयारी मार्ग जलमय

सकाळ वृत्तसेवा
पालघर, ता. १६ : दळणवळणाच्या दृष्टीने महत्त्वपूर्ण आणि पालघर पूर्व-पश्चिमेला जोडणारे नवली रेल्वे फाटक समर्पित रेल्वे मालवाहतूक प्रकल्पामुळे बंद करण्यात आले. या रेल्वे फाटकावर निर्माणाधीन असलेला उड्डाणपूलही वाहतुकीसाठी बंद आहे. अशातच दोन्ही दिशांना जाण्यासाठी पर्याय असलेला भुयारी मार्ग जलमय झाल्यामुळे नागरिकांची गैरसोय होत आहे. लोकमान्यनगर भागातील रेल्वेला समांतर परिसरात हा पर्यायी भुयारी मार्ग असून, पावसात पूर्णतः जलमय झाल्याने हजारो नागरिकांनी पश्चिमेकडे जायचे कसे, असा सवाल नागरिक उपस्थित करू लागले आहेत.

नवली फाटकामुळे पूर्वेकडील नवली, वेवूर, मोर आळी, कमारे, वरखुंटी अशा १२ ते १५ गावे पालघरला थेट जोडली आहेत. रेल्वे मार्गाला समांतर असा समर्पित रेल्वे मालवाहतूक प्रकल्पाचे काम पूर्णत्वास आल्यामुळे हे फाटक बंद करण्याचा निर्णय प्रशासनाने घाईघाईने घेतला. या रेल्वे फाटकावर उड्डाणपुलाचे काम अजूनही अपूर्ण असताना नागरिकांना पर्याय न ठेवता, त्यांचे ऐकून न घेता फाटक बंद केले गेले. सद्य:स्थितीत वेवूरमार्गे छत्रपती शिवाजी महाराज चौक व पुढे इच्छित स्थळी जाणारा असा एक पर्यायी रस्ता आहे, मात्र यासाठी दोन ते तीन किमी फेरा पडत असल्यामुळे वेळ व इंधन दोन्हीही वाया जात आहे. त्यामुळे पूर्वेकडील नागरिकांची पश्चिमेला येण्यासाठी भलतीच त्रेधातिरपीट होत आहे.

नवली रेल्वे उड्डाणपूल पूर्ण होईपर्यंत फाटक बंद करण्यात येऊ नये, अशी आग्रही मागणी पालघर पूर्वेकडील गावांची होती. त्यासाठी या गावांनी एकत्रित येऊन अनेक आंदोलनेही केली. दरम्यान, नागरिकांच्या प्रवासाची सोय व सुविधा लक्षात न घेता प्रशासनाने घाईघाईने निर्णय घेऊन रेल्वे फाटक बंद केले. काम सुरू असल्याने उड्डाणपूलही बंद आहे. आता सोयीचा असलेला भुयारी मार्ग पूर्णपणे पाण्याने भरलेला आहे. त्यामुळे पूर्वेकडील नागरिकांनी पश्चिमेला जायचे कसे, असा प्रश्न नागरिकांपुढे उपस्थित झाला आहे.

पूर्वेकडील जनतेने पुलाची मागणी केली. रेल्वेने एक प्रकारे तरण तलाव दिला. पालघर रेल्वे फाटक बंद करून जलमय होणारा पर्यायी डोकेदुखीचा भुयारी मार्ग दिला. जलमय भुयारी मार्गातून जाण्यासाठी आम्हाला बोट आणि लाईफजॅकेट द्यावे, अशी डीएफसीच्या अधिकाऱ्यांना तसेच पश्चिम रेल्वेच्या व्यवस्थापकांकडे मागणी आहे.
- केदार काळे, माजी सदस्य, विभागीय रेल्वे सल्लागार समिती, पश्चिम रेल्वे