कळंबोलीत डोळ्यालापट्टी लावून दहीहंडी शोधण्याचा खेळ

कळंबोलीत डोळ्यालापट्टी लावून दहीहंडी शोधण्याचा खेळ
पनवेल, ता. १६ (बातमीदार) ः कळंबोली बिमा संकुल परिसरात रामदास शेवाळे प्रतिष्ठानच्या वतीने पारंपारिक पद्धतीने दहीहंडी उत्सव साजरा करण्यात आला. हनुमान मंदिरामध्ये डोळ्याला पट्टी बांधून दहीहंडी शोधण्याचा अनोखा खेळ खेळून उपस्थितांनी एक वेगळा आनंद आणि उत्साहाची अनुभूती घेतली.
रामदास शेवाळे प्रतिष्ठानच्या वतीने दरवर्षी बिमा संकुलामध्ये दहीहंडी उत्सव साजरा केला जातो. पनवेल परिसरातील महत्त्वाच्या दहीहंड्यापैकी ही एक हंडी समजले जाते. पनवेलसह ठाणे आणि मुंबई येथून गोविंदा पथक या ठिकाणी येऊन थर लावतात. त्याचबरोबर दहीहंडीची गोविंद पथक फोडतात. यासाठी रोख रकमेसह वेगवेगळ्या बक्षिसांची खैरात केली जाते. भव्यदिव्य स्वरूप असलेल्या हा दहीहंडी उत्सव दोन-तीन वर्षांपासून अत्यंत साध्या पद्धतीने साजरा केला जात आहे. पारंपरिक पद्धतीने गोपाळकाला आणि दहीहंडी उत्सव साजरा करण्याचा निर्णय रामदास शेवाळे प्रतिष्ठानच्या वतीने घेण्यात आला. त्यानुसार बिमा नाक्यावरील हनुमान मंदिरात पारंपरिक पद्धतीने दहीहंडी बांधण्यात आली. तत्पूर्वी श्रीकृष्ण जन्माष्टमीनिमित्त पूजा करण्यात आली. त्यानंतर डोळ्यावर पट्टी बांधून दहीहंडी शोधण्याचा पारंपरिक खेळ खेळण्यात आला. शिवसेनेचे जिल्हाप्रमुख तथा बिमा संकुलाचे अध्यक्ष रामदास शेवाळे यांनीसुद्धा यामध्ये सहभाग नोंदवत, दहीहंडी उत्सवाचा आनंद घेतला. उद्योजक शंकर विरकर, सुरेश देवाडिगा, शरद कदम, लहू मलकमीर यांनीही डोळ्याला पट्टी बांधून मंदिरात बांधण्यात आलेल्या हंडीला स्पर्श करून आगळी वेगळी अनुभूती घेतली.