दिवाळे कोळीवाड्यात कृष्ण जन्माष्टमी उत्सव

दिवाळे कोळीवाड्यात कृष्ण जन्माष्टमी उत्सव
तुर्भे, ता. १६ (बातमीदार) : दिवाळे ग्रामस्थ मंडळाच्या वतीने दिवाळे कोळीवाड्यात पारंपरिक भक्तिभावाने कृष्ण जन्माष्टमी सोहळा मोठ्या उत्साहात पार पडला. हनुमान मंदिर परिसरात अखंड हरिनाम सप्ताहाचे आयोजन करण्यात आले होते. या सात दिवसांच्या भक्तिमय उपक्रमामुळे कोळीवाडा तसेच पंचक्रोशी परिसर हरिनामाच्या गजराने दुमदुमून गेला. मंदिराची विद्युत रोषणाई, फुलांची सजावट आणि भजन-कीर्तनांच्या कार्यक्रमामुळे परिसराला जणू धार्मिक उत्सवाचे रूप प्राप्त झाले होते.
सप्ताहात सकाळी काकडा आरती, ग्रंथराज ज्ञानेश्वरी पारायण, गाथा भजन, सायंकाळी हरिपाठ, कीर्तन आणि रात्री पंचक्रोशीतील गावांचे भजन असे उपक्रम सातत्याने राबविण्यात आले. यावेळी श्रुशाव्य बॅण्ड वादनाने वातावरण अधिक उत्साही झाले. सात दिवसांच्या अखंड हरिनाम सप्ताहाचा समारोप गोकुळ अष्टमीच्या मध्यरात्री कृष्ण जन्मोत्सवाने झाला. रात्री १२.४० वाजता वारकरी व भाविकांनी मोठ्या संख्येने एकत्र येऊन भगवान श्रीकृष्णाचा जन्मोत्सव पारंपरिक पद्धतीने साजरा केला. संत मंडळींनी टाळ-मृदूंगाच्या गजरात कीर्तन केले तर महिला भाविकांनी फुगड्या खेळून आनंदोत्सवात भर घातली. या सोहळ्याचे वैशिष्ट्य म्हणजे वारकरी संप्रदायातील ह.भ.प. अनुराधा कौस्तुभ तळेकर यांनी सादर केलेले कीर्तन. त्यांच्या गोड वाणीतील अभंग, तत्वचिंतन आणि संत वाङ्मयाचे सखोल विश्लेषण भाविकांना मंत्रमुग्ध करणारे ठरले. अखंड हरिनाम सप्ताह ही वारकरी संप्रदायातील सामूहिक उपासनेची एक प्राचीन परंपरा असून संत ज्ञानेश्वर, तुकाराम यांसह इतर संतांच्या रचनांवर आधारित विचारमंथनाचा यात समावेश असतो. गोकुळाष्टमीच्या दिवशी गावातील पहिली मनाची दहीहंडी संत मंडळींच्या हस्ते फोडण्यात आली. त्यानंतर गावातील इतर दहीहंड्यांना सुरुवात झाली. महाआरतीनंतर महाप्रसादाचे वाटप करण्यात आले. याचा पंचक्रोशीतील भाविकांनी लाभ घेतला. गावातील ही अखंडित परंपरा अनेक वर्षांपासून जोपासली जात असून, उत्सवाने सामुदायिक ऐक्य व श्रद्धेचे दर्शन घडवले.