मेट्रो स्थानकातून विमानतळावर जाण्यासाठी पादचारी पूल

विमानतळावर जाण्यासाठी पादचारी पूल
८८ मीटर लांबीचा पूल सेवेत

सकाळ वृत्तसेवा
मुंबई, ता. १६ : छत्रपती शिवाजी महाराज आंतरराष्ट्रीय विमानतळाच्या टर्मिनल २ला आता मेट्रो स्थानकाशी थेट जोडणारा नवा पादचारी पूल उभारण्यात आला आहे. त्यामुळे पादचाऱ्यांना माेठा दिलासा मिळाला आहे. या पुलाच्या माध्यमातून भूमिगत सीएसएमआयए मेट्रो स्थानक (मेट्रो लाइन ३)ला टर्मिनल २ सोबत थेट जोडले जात आहे. त्यामुळे प्रवाशांना आता विमानतळावर सहजपणे आणि कमी वेळेत पोहोचणे शक्य होणार आहे.
विमानतळावर जाण्यासाठी मेट्रोचा वापर करणाऱ्या प्रवाशांची गैरसोय टाळण्यासाठी एमएमआरडीएने मेट्रो-३ वरील भुयारी स्थानकापासून विमानतळापर्यंत ८८ मीटर लांबीचा आणि ४.३ मीटर रुंदीचा मजबूत स्ट्रक्चरल स्टीलपासून पादचारी पूल बांधला आहे. सध्या काम सुरू असलेल्या मेट्रो लाइन ७ अ स्टेशनच्या कमानीच्या वर, जमिनीपासून तब्बल २३ मीटर उंचीवर हा पूल उभारण्यात आला आहे. या पुलामुळे पायी प्रवासाचे अंतर ४५० मीटरवरून फक्त ११८ मीटरपर्यंत कमी होणार आहे. तसेच रस्ता ओलांडण्याची गरज राहणार नसल्याने प्रवाशांना मोठा दिलासा मिळणार आहे.