कुर्ल्यात दहीहंडीत पालिका निवडणुकीचा ज्वर

कुर्ल्यात पालिका निवडणुकीचा ज्वर
मुंबई, ता. १६ : दहीहंडी उत्सवानिमित्त शनिवारी (ता. १६) कुर्ला परिसरात महापालिका निवडणुका आल्याची चाहूल लागली. आगामी निवडणुका लक्षात घेत सर्वच राजकीय पक्षांनी ठिकठिकाणी दहीहंडी उत्सवाचे आयोजन करीत शक्तिप्रदर्शन केले.
कुर्ला पूर्वेला शिवसेना ठाकरे गटाने आणि शिवसेना शिंदे गटाचे आमदार मंगेश कुडाळकर आमनेसामने भव्य हांडी बांधत जोरदार शक्तिप्रदर्शन केले. तर कुर्ला पश्चिमेला शिवसेना ठाकरे, शिवसेना शिंदे गट, मनसे, भाजप अशा सर्वच पक्षांतील पालिका निवडणुका लढवण्यास इच्छुक असलेल्या कार्यकर्त्यांनी दहीहंडीच्या माध्यमातून आपले स्थान बळकट असल्याचे दाखविले. दरम्यान, कुर्ला स्थानकाला लागून असलेल्या नेहरूनगर येथे शिवसेनेने ठाकरे गटाच्या वतीने रस्त्यावरच दहीहंडीचे आयोजन केले होते. मनोरे उभारताना गर्दी होत असल्याने या ठिकाणी वाहतुकीचा खोळंबा होत होता. त्यामुळे कुर्ला स्थानकाच्या दिशेने येणाऱ्या-जाणाऱ्या वाहनांची मोठी कोंडी होत होती. परिणामी वाहतूक पूर्ववत करण्यासाठी पोलिसांना मोठी कसरत करावी लागली.