तळे मराठी शाळेत ध्वज फडकविण्याचा मान श्रावणी दळवीला.

तळ्यात ध्वज फडकविण्याचा मान विद्यार्थिनीला
तळा, ता.१६ (प्रतिनिधी) ः तालुक्यात स्वातंत्र्य दिन शुक्रवारी (ता. १५) उत्साहात साजरा करण्यात आला. यावेळी नगरपंचायत, तहसील यांसह सर्वच शासकीय कार्यालयांमध्ये त्या-त्या प्रमुख अधिकाऱ्यांच्या हस्ते ध्वज फडकविण्यात आला. मात्र, तळा शहरातील रायगड जिल्हा परिषदेच्या मराठी शाळेत श्रावणी दळवी या विद्यार्थिनीच्या हस्ते ध्वजारोहण करण्यात आले.
दरवर्षी महत्वाच्या समजल्या जाणाऱ्या नवोदय परीक्षेत प्रथम क्रमांकाने उत्तीर्ण होणाऱ्या विद्यार्थ्यांच्या हस्ते स्वातंत्र्य दिनाला शाळेतील ध्वजारोहण केले जाते. श्रावणी दळवी या विद्यार्थिनीने नवोदय परीक्षेत ९५ टक्के गुण मिळवून प्रथम क्रमांकाने उत्तीर्ण झाली. त्यामुळे यावर्षी स्वातंत्र्यदिनाला श्रावणीच्या हस्ते शाळेतील ध्वजारोहण करण्यात आले. याप्रसंगी शाळेच्या मुख्याध्यापिका सुप्रिया जामकर, शाळा व्यवस्थापन समिती अध्यक्ष भास्कर गोळे, उपाध्यक्षा वेदिका गोरीवले, शिक्षक सुनिल बैकर, मित्तल वावेकर यांसह सर्व शिक्षक वर्ग, पालक व विद्यार्थी मोठ्या संख्येने उपस्थित होते.