पनवेलमध्ये ''मयूखा'' महोत्सवाचे आयोजन

पनवेलमध्ये ''मयूखा'' महोत्सवाचे आयोजन
भारतीय शास्त्रीय नृत्याचा भव्य उत्सव रसिकांसाठी विनाशुल्क
पनवेल, ता. १६ (बातमीदार) ः पनवेलची सांस्कृतिक भूमी ता. २३ ऑगस्ट रोजी पारंपरिक भारतीय शास्त्रीय नृत्याच्या तेजाने उजळून निघणार आहे. नृत्यार्पणा फाईन आर्ट्स सेंटरच्या वतीने आयोजित करण्यात आलेल्या ‘मयूखा’ या भव्य महोत्सवात मोहिनीयट्टम नृत्यशैलीतील सोलो सादरीकरणांसह थेट वाद्यमेळ प्रेक्षकांसमोर सादर केला जाणार आहे. हा कार्यक्रम पनवेलमधील विरुपाक्ष मंगल कार्यालयात संध्याकाळी ६ वाजता सुरू होईल. प्रेक्षकांना पारंपरिक भारतीय नृत्यकलेचा आस्वाद घेण्याची ही एक दुर्मीळ संधी आहे. कार्यक्रमाचे प्रमुख पाहुणे म्हणून आमदार प्रशांत ठाकूर, विधान परिषद आमदार विक्रांत पाटील, पनवेल महापालिकेचे माजी सभागृहनेते व प्रायोजक परेश ठाकूर, तसेच नॅशनल टेलिफोन अ‍ॅडव्हायजरी कमिटीचे सदस्य उपस्थित राहणार आहेत. विशेष पाहुण्यांमध्ये नालंदा नृत्यकला महाविद्यालयाच्या प्राचार्या डॉ. उमा रेले, मोहिनीयट्टम नृत्यांगना व संस्थापिका-निदेशिका डॉ. डिंपल नायर, मल्याळम अभिनेत्री व शास्त्रीय नृत्यांगना देवी चंदना, आणि मराठी अभिनेत्री तन्वी पळव यांचा समावेश आहे. महोत्सवाची संकल्पना आणि दिग्दर्शन हे पद्मभूषण डॉ. कनक रेले यांची शिष्या आणि नालंदा नृत्यकला महाविद्यालयाच्या माजी विद्यार्थिनी नयना प्रकाश यांचे असून, त्यांच्या नेतृत्वाखाली हा सांस्कृतिक सोहळा आकार घेत आहे. नृत्य, लास्य आणि भावनांची जिवंत साक्षात्कारे देणारा ‘मयूखा’ हा महोत्सव सर्व कलाप्रेमींसाठी एक पर्वणी ठरणार असून, त्याचा लाभ जास्तीत जास्त रसिकांनी घ्यावा, असे आवाहन आयोजकांनी केले आहे. अधिक माहितीसाठी नृत्यदिग्दर्शिका नयना प्रकाश ( ७७०००५२४२९) यांच्याशी संपर्क साधावा.