उरणमध्ये पारंपरिक नृत्याचे सादरीकरण

उरणमध्ये पारंपरिक नृत्याचे सादरीकरण
उरण, ता.१६ (वार्ताहर) : उरण तालुक्यात यावर्षी दहीहंडी उत्सव उत्साहात साजरा झाला. तब्बल ११ ठिकाणी लाखोंच्या बक्षिसांसह उंच उंच मनोरे लावत पारंपारिक सोहळा रंगला. या उत्सवात तरुणाईचा उत्साह ओसंडून वाहत होता, तर ग्रामीण भागात पारंपरिक नृत्यांचेही आकर्षक सादरीकरण झाले.
उरण शहरासह जेएनपीटी वसाहत व गावागावात दहीहंड्यांचे आयोजन करण्यात आले. तरुणांचा सहभाग मोठ्या प्रमाणात दिसून आला. विशेष म्हणजे महिलांनीही चार थर रचून दहीहंडी फोडण्यात सहभाग नोंदवला. उरण शहरात आमदार महेश बाळदी मित्र मंडळ आणि जेएनपीए वसाहत येथे दोन ठिकाणी दहीहंडीचा मोठा उत्सव झाला. ग्रामीण भागातील खोपटा व पिरकोन येथेही लाखांची बक्षिसे ठेवण्यात आली होती. या ठिकाणी अनेक गोविंदा पथकांनी सात-आठ थर रचून दहीहंडी फोडण्यासाठी ताकद आजमावली. काही ठिकाणी सेलिब्रिटींना खास आमंत्रित करण्यात आले होते, ज्यामुळे उत्सवाची रंगत आणखी वाढली. कलंबुसरे येथील आदर्श दहीहंडी मंडळाने पारंपरिक नृत्यांचे सादरीकरण करून उत्सवाला विशेष आकर्षण दिले. उरण तालुक्यातील चिरनेर गावात मात्र एक आगळी परंपरा जपली गेली. येथे सावरीच्या झाडावर चढून दहीहंडी फोडण्याचा अनोखा सोहळा पाहायला मिळाला. या पारंपरिक पद्धतीमुळे गावकऱ्यांना जुन्या आठवणींना उजाळा मिळाला. उरण तालुक्यातील दहीहंडी उत्सव हा फक्त थरार व स्पर्धेपुरता मर्यादित न राहता सांस्कृतिक वारशाचे दर्शन घडविणारा ठरला. तरुणाईचा उत्साह, महिलांचा सहभाग, पारंपरिक नृत्य आणि ग्रामीण परंपरा यामुळे यावर्षीचा दहीहंडी उत्सव संस्मरणीय ठरला.