मनसे शिवसैनिकांचा डीएनए एक

मनसे-शिवसैनिकांचा डीएनए एक
मनसे नेते अविनाश जाधव यांचे प्रतिपादन
सकाळ वृत्तसेवा
ठाणे, ता. १६ : मनसैनिक आणि शिवसैनिक यांचा डीएनए एकच आहे. त्यामुळे जुळवून घेणे सोपे आहे. आता आम्ही कुटुंबासोबत एकत्र आल्याची प्रतिक्रिया मनसे नेते अविनाश जाधव यांनी मनसे-शिवसेना युतीबाबत दिली. तसेच यापूर्वी लोकसभा निवडणुकीत भाजपचा प्रचार केला त्या वेळी कार्यकर्ते नाराज होते, असा गौप्यस्फोटदेखील त्यांनी या वेळी केला.

ठाण्यातील भगवती मैदानात ‘मराठी सणांसाठी, मराठी मनांसाठी’ या शीर्षकाखाली मनसेच्या वतीने दहीहंडी उत्सवाचे आयोजन केले होते. या वेळी मनसे नेते अविनाश जाधव यांनी प्रसारमध्यामंशी संवाद साधताना ही प्रतिक्रिया दिली. मनसे व शिवसेनेने एकत्र यावे, याबाबतचा निर्णय राज ठाकरे व उद्धव ठाकरे घेतील; मात्र एक मराठी कुटुंबात जन्म घेतला माणूस म्हणून या दोघा भावांनी मराठी माणसासाठी एकत्र आलेच पाहिजे, असे मत मनसे नेते अविनाश जाधव यांनी व्यक्त केले. तसेच मनसे व शिवसेना या दोन्ही पक्षांचा व आमच्या कार्यकर्त्यांच डीएनए एक आहे. त्यामुळे जुळवून घेणेदेखील सोपे होणार आहे. यापूर्वी लोकसभेला जे काही आम्ही एकत्र आलो, त्या वेळी कार्यकर्ते नाराज होते, असा गौप्यस्फोटदेखील जाधव यांनी या वेळी केला.

आता आम्ही सगळे कुटुंबीयांसोबत एकत्र आलोय. मनसे व शिवसैनिकांची घरे मूळ मराठी आहेत. आता आम्ही कुटुंब म्हणून एकत्र आलोय. यापूर्वी आम्ही कार्यकर्ते म्हणून एकत्र आलो होतो, त्या वेळी कुटुंब सोबत नव्हते, असेदेखील जाधव यांनी सांगितले. राज ठाकरे यांनी ठाण्यात युती करण्याबाबत आदेश दिला, तर आम्हाला ते नक्की आवडेल, असेदेखील जाधव यांनी या वेळी सांगितले. राजन विचारे यांनी मागील अडीच-तीन वर्षांपासून लढत पक्ष जिवंत ठेवला, अशा माणसाबरोबर काम करायला आवडेल, असे सांगत निष्ठा महत्त्वाची असल्याचे त्यांनी या वेळी अधोरेखित केले.

मागील काही दिवसांपासून बघाल तर मराठी माणूस अडचणीत आहे. हिंदीसक्ती करणे असेल, मराठी माणसाला घरात घुसून मारणे असेल. आता या सगळ्या गोष्टी खूप वाढल्या आहेत. त्यामुळे मराठी माणसासाठी दोन्ही भावांनी एकत्र येणे गरजेचे असल्याचे अविनाश जाधव यांनी या वेळी सांगितले.