संशयास्पद ऑइल आढळल्याने इसमास अटक

संशयास्पद ऑइल आढळल्याने अटक
वासिंद, ता. १६ (बातमीदार) : येथील पोलिस स्थानक हद्दीत दहागांवजवळील जिल्हा परिषद शाळेनजीक अशोक लेलॅंड कंपनीचा संशयास्पद टेम्पो आढळून आला. स्थानिक गुन्हे शाखेच्या पोलिसांनी तपासणी केली असता, त्यात काळे ऑइल भरलेले १८० लिटरचे १० ड्रम आढळून आले. याप्रकरणी वाहनचालकावर गुन्हा दाखल करण्यात आला आहे.
वाहन तपासणीवेळी वाहनचालकाकडे पावती-बिले मागितली असता, कोणतीही कागदपत्रे न दाखवता समाधानकारक उत्तर न मिळाल्याने ही मालमत्ता लबाडीने किंवा चोरीच्या उद्देशाने कब्जात बाळगल्याप्रकरणी वासिंद पोलिस ठाण्यात गुन्हा दाखल करण्यात आला आहे. ठाणे ग्रामीण स्थानिक गुन्हे शाखेचे पोलिस शिपाई स्वप्नील बोडके यांनी याबाबत वासिंद पोलिस ठाण्यात तक्रार नोंद केली. पोलिसांनी ७५ हजार किमतीचे काळे ऑइल आणि चार लाख रुपये किमतीचा टेम्पो ताब्यात घेतला आहे. पुढील तपास वरिष्ठ पोलिस निरीक्षक सचिन हुंदळेकर यांच्या नेतृत्वात केला जात आहे.