समुद्रात मासेमारी बोटीला मालवाहू जहाज धडकले

मासेमारी बोटीला मालवाहू जहाजाची धडक
मुरबे येथील १५ खलाशांना वाचविण्यात यश
बोईसर, ता. १६ (बातमीदार) : बोईसर येथील मुरबे बंदरातून खोल समुद्रात मासेमारीसाठी गेलेली जय श्री साई ही बोट गुरुवारी (ता. १४) रात्री नऊ वाजता जाळी टाकून नांगरून ठेवलेली असताना, वेगाने आलेल्या एका मालवाहू बोटीने तिला जोरदार धडक दिली. यामध्ये बोटीत झोपलेले चार मच्छीमार समुद्रात फेकले गेले; मात्र या वेळी अन्य बोटींच्या मदतीने त्यांना वाचवले गेले. एकूण १५ मच्छीमार असलेल्या या बोटीने शुक्रवारी (ता. १५) आपला किनारा गाठला.
धडकेनंतर बोटीतील तांडेलने साईप्रिया बोटीचे मालक जितेंद्र राजेंद्र तरे यांच्याशी संपर्क साधत मदत मागितली. जितेंद्र आणि शांताराम ठाकरे यांनी बोटीने अपघातग्रस्त बोटीला गाठले. त्याच वेळी समुद्रात पडलेल्या चार खलाशांना वाचविण्यात यश आले. दोन्ही बोटींनी दोरखंडाच्या साहाय्याने जय श्री साई बोटीला बांधून शुक्रवारी साडेतीन वाजता सुखरूप मुरबे बंदरात आणल्याचे मुरब्याचे उपसरपंच राकेश तरे यांनी सांगितले.
बोटीतील १४ मच्छीमार खलाशांनी गुरुवारी रात्री नऊ वाजता बोटीतील सर्व जाळी मासे पकडण्यासाठी समुद्रात टाकली. त्यानंतर अँकर टाकून आणि बोटीवरील सिग्नल लाइट चालू करून काही मच्छीमार झोपी गेले, तर बोटीच्या तांडेलने आपल्या सहकाऱ्यांसह समुद्रात टाकलेल्या जाळ्यांवर लक्ष ठेवले होते.