एमआयटी विश्वशांती गुरुकुलमध्ये स्वातंत्र्यदिन उत्साहात

एमआयटी विश्वशांती गुरुकुलमध्ये स्वातंत्र्यदिन उत्साहात
नवी मुंबई, ता. १६ : देशभक्तीचा उत्साह, सामाजिक जबाबदारीची जाणीव आणि सांस्कृतिक विविधतेचा रंग भरलेला ७९ वा स्वातंत्र्यदिन एमआयटी विश्वशांती गुरुकूल स्कूलमध्ये जल्लोषात साजरा करण्यात आला. यावेळी निवृत्त कर्नल सुरेंद्रनाथ यांच्या हस्ते ध्वजारोहण झाले. ध्वजारोहणानंतर त्यांनी विद्यार्थ्यांना संबोधित करताना स्वातंत्र्यसैनिकांच्या बलिदानाची आठवण करून दिली आणि नव्या पिढीने जबाबदार नागरिक म्हणून देशसेवा करण्याचे आवाहन केले. या वर्षीचा उत्सव “हमारा देश, हमारी शान” या संकल्पनेवर आधारित होता. कार्यक्रमाचा प्रमुख आकर्षण ‘कनेक्टिंग हार्ट्स’ उपक्रम ठरला, ज्यांतर्गत दिव्यांग विद्यार्थ्यांनी नृत्य, गायन व कला सादरीकरण करून उपस्थितांची मने जिंकली. शाळेच्या मुख्याध्यापिका अंशू सक्सेना यांनी त्यांच्या प्रतिभेला गौरवण्यासाठी विशेष सन्मानचिन्ह प्रदान केले. दिव्यांग विद्यार्थ्यांच्या आत्मविश्वासपूर्ण सादरीकरणाने संपूर्ण वातावरण भारावून गेले. शाळेतील विद्यार्थ्यांनी देशभक्तीपर गीत, नृत्य आणि नाटिकांद्वारे भारताची समृद्ध सांस्कृतिक परंपरा व लोकशाही मूल्ये उलगडून दाखवली. ड्रीम बलून परेड आणि वेशभूषा स्पर्धा विशेष आकर्षण ठरली. विद्यार्थ्यांनी महात्मा गांधी, नेताजी सुभाषचंद्र बोस, सरदार वल्लभभाई पटेल यांसारख्या राष्ट्रीय नेत्यांची भूमिका साकारून प्रेक्षकांना प्रेरित केले.