असत्याची हंडी फोडू : पीयूष गोयल

असत्याची हंडी फोडू : पीयूष गोयल

मुंबई, ता. १६ : उत्तर मुंबईत ‘आला रे आला, गोविंदा आला’ अशा घोषणांनी दहीहंडी उत्सव जल्लोषात साजरा करण्यात आला. मालाड, बोरिवली, दहिसर आणि मागाठाणे मतदारसंघांमध्ये सांस्कृतिक विविधतेने आणि सामुदायिक सहभागाने हजारो लोकांनी हजेरी लावली. या परिसरातील अनेक दहीहंडी सोहळ्यांना केंद्रीय मंत्री पीयूष गोयल यांनी हजेरी लावून शुभेच्छा दिल्या. ‘असत्याची हंडी फोडून सत्य आणि ऐक्याचा विजय करावा लागेल, असे प्रतिपादन त्यांनी या वेळी केले.

पीयूष गोयल म्हणाले, दहीहंडीची परंपरा, एकता आणि शौर्याचा उत्सव आहे. विश्वासावर उभे राहिलेले हे मानवी मनोरे आपल्या सामूहिक आकांक्षा दर्शवतात. खरी ताकद ही पडल्यावर पुन्हा उभे राहण्यात आहे, जसा कृष्णाने कंसाचा पराभव केला, तसेच आपल्यालाही असत्य आणि फूट पाडणाऱ्या कथांचा पराभव करावा लागेल. असत्याची हंडी फोडून सत्य आणि ऐक्याचा विजय करावा लागेल. मालाड येथे भाजप प्रवक्ते विनोद शेलार, मागाठाणे मतदारसंघात आमदार प्रकाश सूर्ये, आमदार प्रवीण डेरेकर, आमदार मनीषा चौधरी, बोरिवलीत आमदार संजय उपाध्याय, नगरसेवक शिवा शेट्टी, उत्तर मुंबई भाजप जिल्हाध्यक्ष बाळा तावडे आणि कमलेश यादव यांच्या दहीहंडी सोहळ्यांना पीयूष गोयल यांनी हजेरी लावली.