बेस्ट प्रवर्तक अपघातात जखमी

बेस्ट प्रवर्तक अपघातात जखमी
दुचाकीस्वाराविरोधात गुन्हा दाखल
सकाळ वृत्तसेवा
ठाणे : ठाण्यातील तीन हात नाका चौकी येथे कर्तव्यावर असलेले बेस्ट प्रवर्तक काकासाहेब कदम यांना विरुद्ध दिशेने आलेल्या दुचाकीने धडक दिल्याची घटना समोर आली आहे. या घटनेत कदम यांच्या उजव्या पायाच्या गुडघ्याच्या खाली हाडाला फ्रॅक्चर झाले आहे. याप्रकरणी त्या अनोळखी दुचाकीस्वाराविरोधात गुन्हा दाखल झाला आहे.
वागळे इस्टेट येथे राहणारे कदम हे १५ ऑगस्ट रोजी दुपारच्या सुमारास तीन हात नाका चौकी येथे बेस्ट प्रवर्तक म्हणून कर्तव्य बजावत होते. त्या वेळी बसची वाट पाहात असताना त्यांच्या पाठीमागून विरुद्ध दिशेने भरधाव आलेल्या अनोळखी दुचाकीस्वाराने जोरदार धडक दिली. त्या धडकेत ते खाली पडले आणि दुचाकीस्वार पळून गेला. या घटनेनंतर कदम यांनी बेस्ट अधिकारी तातले यांना फोन करून याबाबत माहिती दिली. त्यांनी कदम यांच्या मुलाला बोलवून मुलुंड येथील रुग्णालयात उपचारार्थ दाखल केले. डॉक्टरांनी तपासून एक्सरे काढल्यावर कदम यांच्या उजव्या पायाच्या गुडघ्या खालच्या हाडाला फॅक्चर झाल्याचे तक्रारीत नमूद केले आहे. याप्रकरणी पोलिस ठाण्यात गुन्हा दाखल करण्यात आला असून, पुढील तपास पोलिस करीत आहेत.