८३ दिवसांत जे. जे. रुग्णालयात १०१ रोबोटिक शस्त्रक्रिया

८३ दिवसांत जे. जे. रुग्णालयात १०१ रोबोटिक शस्त्रक्रिया
सर्व उपचार विनामूल्य; गरजू रुग्‍णांना दिलासा
सकाळ वृत्तसेवा
मुंबई, ता. १७ : जे. जे. समूह रुग्णालयामध्ये केवळ ८३ दिवसांत तब्बल १०१ रोबोटिक शस्त्रक्रिया केल्या आहेत. ९ एप्रिलला या शस्त्रक्रिया सुरू करण्यात आल्या होत्या. एवढ्या कमी कालावधीत इतक्या शस्त्रक्रिया पूर्ण केल्‍याने रुग्‍णालयाच्या कामगिरीचे कौतुक होत आहे.
प्रा. डॉ. अजय भंडारवार यांच्या नेतृत्वाखाली ही योजना राबवण्यात आली असून, डॉ. गिरीश बक्षी, डॉ. अमोल वाघ, डॉ. चंद्रकांत साबळे, डॉ. काशिफ अन्सारी आणि डॉ. सुप्रिया भोंडवे, डॉ. कविता जाधव या टीमने ही कामगिरी साधली. रोबोटिक शस्त्रक्रियेच्या मदतीने पित्ताशय, हर्निया, जठरांत्र तसेच कर्करोग शस्त्रक्रिया लहान चिरे, कमी रक्तस्राव व जलद बरे होण्याच्या प्रक्रियेसह करण्यात आल्या. हे सर्व उपचार सरकारी रुग्णालयात विनामूल्य करण्यात आल्याने आर्थिकदृष्ट्या दुर्बल रुग्णांनाही जागतिक दर्जाची सुविधा मिळाली. पहिली शस्त्रक्रिया ३७ वर्षीय विकास गोसावी यांच्यावर, त्‍यानंतर स्मिता तिवारी यांच्यावर शस्‍त्रक्रिया झाली.
मुख्यमंत्री, वैद्यकीय शिक्षणमंत्री हसन मुश्रिफ, सचिव धीरज कुमार, आयुक्त अनिल भंडारी, डॉ. अजय चंदनवाले यांच्या प्रयत्नांमुळे हा उपक्रम साकार झाला.