राज्य उत्पादन शुल्क विभागाची धडक कारवाई

गावागावांत धाडसत्र!
चार महिन्यांत दोन कोटींचा मुद्देमाल जप्त; राज्य उत्पादन शुल्क विभागाची धडक कारवाई

अलिबाग, ता. १७ (वार्ताहर) : राज्य उत्पादन शुल्क विभागाच्या रायगड युनिटने एप्रिल ते जुलै या अवघ्या चार महिन्यांच्या कालावधीत जिल्ह्यातील अवैध दारू व्यवसायाविरोधात मोठ्या प्रमाणावर धडक कारवाई केली आहे. या कालावधीत तब्बल दोन कोटी ५३ लाख ४४ हजार ५४५ रुपयांचा अवैध दारूचा मुद्देमाल जप्त केला असून, ८१७ आरोपींना अटक केली असून, ३६ वाहने जप्त आणि ८५४ गुन्हे दाखल केले आहेत.

रायगड जिल्ह्यात गेल्या अनेक वर्षांपासून विदेशी मद्य, गावठी दारू आणि हातभट्टीच्या दारूचा अवैध धंदा मोठ्या प्रमाणात सुरू आहे. ही दारू बहुधा गोवा, दीव-दमण अशा बाहेरील राज्यांतून आणली जाते आणि रायगडमधील विविध भागांमध्ये छुप्या मार्गांनी विक्रीसाठी नेण्यात येते. या अवैध व्यापारामुळे अनेक कुटुंबांचे संसार उद्ध्वस्त झाले असून, अनेक तरुणांचे आयुष्य दारूच्या आहारी जाऊन बर्बाद झाले आहे. ही गंभीर स्थिती लक्षात घेऊन राज्य उत्पादन शुल्क विभागाने रायगड जिल्ह्यात विशेष मोहीम राबवण्याचा निर्णय घेतला. यामध्ये जंगली भाग, दुर्गम गावे, महामार्गांवर गुप्त छापे टाकून अवैध साठे जप्त केले. अलिबागचे निरीक्षक एस. एस. भोसले यांनी सांगितले की, गावठी आणि हातभट्टीवर तयार करण्यात आलेल्या दारूच्या साठ्याचे विश्लेषण करून ते घटनास्थळीच नष्ट करण्यात येतात, जेणेकरून या दारूचा पुन्हा गैरवापर होणार नाही.

राज्य उत्पादन शुल्क विभागाची ही कारवाई म्हणजे समाजातील वाढत्या दारू प्रवृत्तीविरोधात एक ठोस पाऊल आहे. कायद्याची भीती आणि सामाजिक जबाबदारी या दोन्हींचा समतोल राखून प्रशासन अवैध धंद्यांना आळा घालण्याचा प्रयत्न करत आहे. आता नागरिकांनीही पुढाकार घेऊन प्रशासनास सहकार्य केल्यास, रायगड जिल्हा हा अवैध दारूविक्रीपासून मुक्त होण्याच्या दिशेने नक्कीच वाटचाल करू शकेल.

सतर्क नागरिकांची गरज
रायगड जिल्ह्याचे राज्य उत्पादन शुल्क अधीक्षक आर. आर. कोले यांनी स्पष्ट केले की, विभागाने अवैध दारूविक्री, परवानगीशिवाय देशी-विदेशी मद्याची वाहतूक आणि साठवणुकीवर कडक नजर ठेवली आहे. कोणत्याही ठिकाणी संशयास्पद हालचाली दिसल्यास नागरिकांनी त्वरित विभागाशी संपर्क साधावा, असे आवाहनही त्यांनी केले आहे.

कारवाईचा तपशील (एप्रिल-जुलै )
तपशील आकडे
जप्त मुद्देमाल २,५३,४४,५४५ (रुपयांत)
अटक आरोपी ८१७
जप्त वाहने ३६
दाखल गुन्हे ८५४